 خطاب إلي السيد المسئول الكبير

 بقلم : ناصر أفندي فؤاد
سيادة المسئول الكبير قوي
السلام عليكم ورحمة الله وبركاته
عارف ان سيادتكم عندك مشغوليات كتيرة جدا ، وعارف ان سيادتك مهتم بكل الناس ، ومفيش عندك فرق بين غني وفقير، ولا يهودي ومسيحي ومسلم . كلنا مصريين ومفيش فرق ، بس للأسف الميه ما بتجريش في العالي .
علشان كده قلت اكتب لسيادتكم ممكن يوصل جوابي وتوصل الميه من المسئول الكبير قوي سيادتك إلي المسئول اللي عنده الرد ، فيرد علينا ويفهمنا . انا مش طرف في السؤال ، بس سيادتكم تعرف كويس جدا ان بواب العمارة ، عنده كل أسرار العمارة ، وبيبقي عارف حاجات ما حدش يعرفها غير صاحب الشأن ، مش حطول علي سيادتكم ، أنا عارف مشاغلكم كتيرة.
الموضوع وما فيه ، فيه ضريبة عقارية بدأت تتحصل وفي ربط بيجي لسكان العمارة ، فيه موظف جه قبل كده وسأل عن كل شقة وعرف مين اللي ساكنها ومين اللي مأجر ومين صاحب الشقة ، كل ده شغل تمام ومحدش يقدر يقول تلت التلاتة كام، ولا يقدر يقول ان ده غلط ، بس اللي مجنني الراجل الطيب اللي مأجر لشركة بعقد صح مكتوب فيه ان الإيجار لشركة والمبلغ اللي بياخده مكتوب في العقد وكل حاجة صح الصح جاله ربط ٦٠٠٠ جم في السنة ، والشقة اللي جنبه نفس شقته بالظبط ومتأجرة لشركة برضه ومتأجرة بمبلغ أكتر بكتير بس صاحبها كان لئيم ومش مظبوط كتب العقد بأسم شخص مش شركة وعامل في العقد انها سكني ، جاله ربط ١٥٠٠ جم !!
سؤالي الاولاني هي الضريبة دي مش علي العقار يعني الشقة وبتتحدد علي سعر الشقة ولا علي النشاط اللي جوه الشقة ؟ ليه فيه فرق هي الشقة اللي متاجرة لشركة لما ييجي يبيعها صاحبها بعد الشركة ما تخرج حتكون أغلي من الشقة أختها التوأم اللي متأجرة سكني ؟ العجيبة ان الشقتين نفس سعر البيع بس الضريبة مختلفة خالص .
سؤالي التاني هو مش فيه مبدأ اسمه عدم ازدواج الضريبة ؟ ولا أي اسم تاني بس معناه ان النفر ما يدفعش علي نفس الحاجة ضريبتين ، الراجل بيدفع ضريبة علي أنه مأجر شقته لشركة تقوموا تدفعوه ضريبة أزيد علشان مش نصاب ولا كذاب وكتب الحق والتاني ما يدفعش رغم ان علي شقته يافطة كبيرة انها شركة .
معلهش آخر سؤال طيب لو الشركة سابت الشقة الراجل يبقي اتسوح ويفضل يدفع مبلغ كبير ولا حتعدلوا قيمة الشقة اللي متغيرش فيها حاجة. سيادة المسئول الكبير قوي ، آسف ما بعرفش أذوق كلامي ، ويمكن سيادتك يقول لك في الرد هو ماله .. إيه اللي حشره ، بس والله العظيم عايز أفهم ، عايز أعرف هي فلوس التعليم المجاني والعلاج المجاني اللي بتتاخد من الضرايب دي صح ولا غلط ، علشان كده لا الدوا ولا التعليم بقي فيهم بركة .
وعلى الله قصد السبيل
ناجح البواب أول دكة على يمين مدخل العمارة.