رسالة إلي المسئول

بقلم ناصر أفندي فؤاد

معالي سيادة السيد الأستاذ الدكتور اللواء المهندس المسئول المحترم السلام عليكم ورحمة الله وبركاته .
للأسف مش عارف مين اللي مسئول أبعت له وعلشان كده بكتب كل الألقاب اللي أعرفها علشان ميبقاش في غلط مع أي حد ، كل مسئول يختار اللي هو عايزه ، في النهاية الموضوع أكبر بكتير من لقب ، الموضوع حياة بني آدمين مصريين ، كل مشكلتهم انهم بيضطروا يسافروا في الطرق بتاعتنا سواء طريق مصر الإسكندرية الزراعي أو دمياط أو بورسعيد أو طبعا أي طريق مش تبع جيشنا العظيم ، لأنهم ولا مؤاخذه بيعملوا صيانة دورية وبيحافظوا علي القواعد بقدر الإمكان.
. الحكاية يا معالي سيادة السيد الأستاذ الدكتور اللواء المهندس المسئول المحترم أن الطرق عليها عربيات نقل كتيره وطبعا اصحاب عربيات النقل عايزين يكسبوا أكتر ، بيحملوا العربيات أكتر ، الطرق والكباري مصممة لحمولات محددة مش لحمولات جهجهوني ، ومع الحر الأسفلت بيبقى أطري ومع فرامل العربيات بعجل كتير محملة أكتر بكتير يبقي الطريق اما حفر قاسية أو موج زي موج البحر ، ييجي المواطن المسكين ولا بيجري ولا عليه ، ينزل المطب أو يطلع موجه ، وبعدها نبدء ندور علي عربية اسعاف تشيله ، إشي عجل بيضرب والسيطرة تروح وتنفلب العربية بالمسكين أو يخبط في شجرة أو حيطة او أو أو .
أما إذا كان بيجري بسرعات جنونية ، فربنا يستر علي الاتجاهين لأنه بيلطش في أي حاجة والضحايا كتير ، ده غير اللي عامل نفسه مفتح وفتك وبيسوق عكس الاتجاه علشان يوفر شوية بنزين واللي بيقطع الطريق السريع بالعرض واللي واللي .. أهُم كتير بعيد عنك وعن عيلتك . معالي سيادة السيد الأستاذ الدكتور اللواء المهندس المسئول المحترم أنا مش عارف الحكاية دي عند مين : وزير النقل ولا محافظ الأقليم ولا المحليات ولا المرور ولا الأسعاف ولا بتاع الميزان البسكول ولا اللي بيسوق من غير رخصة ولا ولا ووووووووووووولا المهم إني عارف أن اروحنا بيتروح وبنفقد أعز الحبايب والمسئول الحقيقي ولا هو هنا .!..
وعلى الله قصد السبيل .
ناجح البواب أول دكة على يمين العمارة