بلبطة ولا عوم

بقلم : ناصر أفندى فؤاد
أكون أو لا أكون .. هذا هو السؤال
ناجح : صباح الفل يا باشا فيه طلب شخصي وعايز تزكية من سعادتك عند الحاجة الكبيرة ربنا يخليها والحاجة الصغيرة ربنا يبارك فيها
العبد لله: اشمعني عايز حماتي ومراتي في ايه يا أستاذ ناجح باشا ، انت طول النهار طالع نازل بتقابلهم وتجيب لهم مشتريات والله اكبر الفكه دايما بتضرب عليها عوافي.
ناجح : الله اكبر تعبي يا باشا والحاج شيكس قال أكون أو لا أكون هذا هو السؤال ، لو معملتش كده مَش حنعرف نعيش ولا نبعت فلوس للبلد.
العبد لله: وليم شكسبير بقي الحاج شيكس الله يرحم فؤاد المهندس مغلطش لما قال شكسبير بعضشي ، بس اساسا كويس انك عارف شكسبير.
ناجح : مَش هو ده مربط الفرس ، سيادتك بتاخدني بعيد عن موضوعي ، أنا عايز واسطة عندهم علشان يزودوا مرتبي ٣٠٪
العبد لله : ٣٠٪ مرة واحدة ما شاء الله واشمعني كمان مرة ، بتقوم بأعمال خارقة
ناجح : لا يا باشا الاسعار حتبقي حارقة وكل ده بسبب تعويم الجنيه والدولار نط فط ركب فوق دماغ عملتنا ، فضلوا يقولوا في كل برامج الفضا ٩ جم سعر غير حقيقي ، مضاربات صرافة مفيش طلب وفيه معروض ولا حاجة مسيطرين علي الوضع وفجأة أخدنا واحد تعويم وصلّحه حسب أصول الصناعة.
العبد لله : الهدوء والسكينة بلاش نتكلم كلام في الهوا ، اللي حصل من محافظ البنك المركزي طريقة للسيطرة علي السوق وده ممكن نتفق او نختلف عليه ، إنما اللي كلنا نتفق عليه ان موضوع انك تزود مرتبك ٣٠٪ غير وارد أصلا ومليش دعوة بيه ، وان اللي حصل تخفيض لسعر الجنيه تقريبا ١٥٪ يعني مفيش تعويم بالمرة تخفيض ياعمنا مَش تعويم
ناجح : لا حول ولا قوة إلا بالله ، خلينا زي ما سعادتك بتقول نتفق على إن أنا كنت متأكد إن سيادتك مَش حتسندني في ٣٠٪ وبرضه إن اللي حصل ده مَش تعويم ده بلبطة وبس.
وعلي الله قصد السبيل