رؤية ناجح البواب .. عجلة المجلس

بقلم : د. ناصر فؤاد

لناجح البواب الكثير من الأقارب ، ويعتبر مدخل عمارتنا الملتقى، ومكان اجتماعهم ، إلا أن سالم الساعي أعلاهم صوتا، وأكثرهم تأثيرا ، وقدرا. أتي سالم ولم يكن ناجح موجودا ، دخلت العمارة وسالم منتظر ، فبادرني بالسؤال:
سالم : أخبار بيت الزكاة إيه يا باشا.
العبد لله وقد استفزني السؤال : وعليكم السلام ورحمة الله وبركاته ، طيب قول الأول السلام، وبعدين اسأل اللي انت عايزه ، مش دي الأصول عندكم يا عمنا .
سالم : السلام عليكم ورحمة الله وبركاته ، أصل سعادتك راسي وعارف اني ابن 7 ، يعني مولود بدري وطول عمري مستعجل يا ريس ، آسف جدا.
العبد لله : قولي انت أخبار سيادة المدير العام إيه ، وأخبار شركتكم إيه؟
سالم : الحمد لله يا باشا ، أنا بقالي سنتين ماسك مكتب رئيس مجلس الإدارة ، وبحْضر كمان كل جلسات المجلس يا باشا ، والحمد لله المدير العام اترقى وبقى هو رئيس مجلس الإدارة ، وما بيشربش أي حاجة إلا من إيدي أنا علشان كده ، طول ما هو في الشركة ما بعرفش أسيب مكتبه.
العبد لله : ما شاء الله بتحضر مجلس الإدارة ، وأكيد بتتعلم منهم الكتير ، معظم مجلس إدارتكم ناس كباره ، وعارفين في الإدارة والسياسة والأقتصاد.
سالم : يا باشا أنا بتعلم منهم ، وكتير بنفض لكلامهم.
العبد لله : بتنفض لكلامهم .. إيه الكلام ده يا عمنا ، انت بتهرج ولا إيه؟! ، عندك 9 من مجلس الإدارة ومعظمهم قيادات في مكانهم وأنت تنفض لهم ، ده ما يصحش أبدا .
سالم : يا باشا ما تفهمنيش غلط ، أنا بتعلم منهم كتير ، بس ساعات مببقاش فاهم ، هم بيتكلموا بجد ولا بيهزروا ، بس الغريبة أن الهزار بيبقى ساعات قرارات .
العبد لله : لا دي عايزه تركيز ، وضح لي يا عمنا.
سالم : خد عندك يا باشا ، آخر مجلس كانوا بيناقشوا ميزانية التشغيل للشركة ، ميزانية بـ 100 مليون جنيه ، ما خدتش منهم ربع ساعة مناقشة ، وأخد منهم يند واحد بـ 3000 جنيه ساعة وربع .
العبد لله : لازم يا عمنا بند مهم جدا .
سالم : مهم جدا لبتاع البوستة في موقع خارجي للشركة ، يعني ولا يسوى وقت مناقشته.
العبد لله: هات ما عندك يا سالم.
سالم : الميزانية مكتوب فيها 3 تروسيكلات يعني 3 عجلات بصندوق لزوم نقل البوستة من موقعين بينهم 3 كيلو وبينقلوا عينات وبوستة وما ينفعش ينقلوها مشي ، وأكيد ما ينفعش يشتروا لها عربية ولا موتوسيكل لأنه حرام ورمي فلوس، والعجلة دي بـ 3 عجلات مش حا تحتاج رخصة ولا سواق، المجلس فضل يناقش فيها وإيه نوع العجلة وليه ياباني مش صيني وليه .. وليه لمدة ساعة وربع .
العبد لله : انت بتتكلم بجد 100 مليون في ربع ساعة والعجل في ساعة وربع ووصلوا لإيه في الآخر.
سالم : وافقوا على 100 مليون جنيه ميزانية ، وخفضوا العجل لعجلتين ترشيدا للنفقات.

وعلى الله قصد السبيل