ناجح البواب ... حمرا

بقلم : د. ناصر فؤاد

نقضي أوقاتا كثيرة منتظرين، ونهدر أموالا أكثر لهذا السبب.
لم أستطع دخول العمارة لتجمع عصبة من أطفال الشوارع، ورجلين، وأربع نساء أمام المدخل، ومعهم شرطيان من المرور.
العبد لله : إيه الزحمة دي على باب العمارة يا ناجح ؟
ناجح : دول أمين الشرطة والعسكري والعيال بتوع الكُولَّه واللي مشغلينهم.
العبد لله : يا ساتر يا رب هو الفساد وصل لكده ، بس براڤوا على الأمين والعسكري قبضوا عليهم ، ربنا يحميهم ، وعلى الله يعملوا كده في المرور ، دي الإشارة اللي على الشارع الكبير طولها ٣ كيلو.
ناجح : قلبك أبيض يا باشا ، الإشارة لازم تكون طويله ، والمرور عمره ما يتصلح لأنه لو اتصلح الاقتصاد يبوظ.
العبد لله : إيه التخاريف والجهل ده ، عطلة المرور بتعطل مصالح الناس ، والعربيات بتستهلك بنزين، والتلوث بيزيد، والاقتصاد بيبوظ بسببها ، إنت شارب حاجة ولا إيه ، إحنا لِسَّه قبل المغرب ، فوق يا ناجح !
ناجح : يا باشا بلاش تا خدني على الحامي ، الكلام اللي بقوله صح الصح ، والاقتصاد اللي بتكلم عنه اقتصاد تحت السلم ، يعني بلغتكم موازي يا باشا
العبد لله : رجعنا للفذلكة ..
ناجح : يا باشا الموضوع سهل خالص ، سيادتك يوميا بتقف في الإشارة قد إيه
العبد لله : في الزحمة تقريبا ١٥ دقيقة وأكتر ، واللي يجننك إن الإشارة لما بتفتح تلاقي بعدها الدنيا فاضية !
ناجح : الله ينور ، هو ده مربط الفرس ، أمين الشرطة، والعسكري، ما كانوش بيقبضوا علي عصابة الكُولَّه ، كانوا بيقبضوا منهم ، وده السبب أن الإشارة بتتعطل بدون سبب ،أصل بتوع الكُولَّه دول اللي بيسرحوهم ـ زعيم العصابة، والفتوة ، ولا مؤاخذة النسوان اللي معاهم .. قوات الانتشار السريع ، كل واحد من العيال له وظيفة: واحد بيبيع مناديل، وواحد بيمسح العربيات، وواحد بيبيع لعبة حمادة، وواحدة تبيع ورد .. وهكذا وطبعا علشان يعرفوا يبيعوا صح لازم يزبَّطوا العسكري، والأمين، علشان يطولوا الإشارة أطول ما يمكن ، وبكده المبيعات تبقى أكتر ، ولم الفلوس يبقى أسهل، العسكري والأمين بياخدوا كل يوم ١٠٠ جنيه وعلبتين سجاير، بس الأمين كان عايز زيادة ، عرفت سعادتك الإشارة أحسن لهم تكون إيه ؟؟؟
العبد لله : حمرا

وعلى الله قصد السبيل