كارت توصية 4

بقلم : د / ناصر فؤاد

معالي السيد المحترم الدكتور وزير الصحة

السلام عليكم ورحمة الله وبركاته

ياباشا آسف جداً لتطفلي علي سيادتكم ، والله عارف قد إيه انت مشغول بهموم البلد، بس هو ده سبب أني ببعت لمعاليك ، ماهي هموم المواطن المسكين من هموم البلد ، وأنا لاسمح الله مش طالب حاجة لي ، أو حاجة حرام أو عيب ، أنا طالب كارت توصية من سيادتك ، يكون مكتوب بالقلم الي لونه أخضر علشان ده اللي بيتقبل ، والتأشيرة عليه تكون " حامله يهمني أمره" وياريت يكون متسمي بأسم " الشعب المصري يهمني أمره"
الحكاية معاليك ومافيها أن الشعب المصري سواء غني ولا فقير ، ميصحش اللي بيحصل فيه من بعض المستشفيات والدكاترة، وأكيد سيادتك يا دكترة عارف أكتر مني القصص والروايات ، أنا حفكر سيادتك ببعضها ، واحدة ست طيبة من المنيا ، طفشت من بيتها بسبب القسوة ولأي سبب مش دي قضيتنا أحنا ، اهلها بلغوا البوليس ، البوليس اللي مش بيعرف يجيب الحرامية ولا القتلة في أحوال كتير ، عرف يجيب الولية دي وبسرعة ودوها علي القسم ، طلبوا أهلها ، وأول ما شمت هي خبر، راحت فاتحة الشباك ونطت من الدور التالت ، وقعت في حوش القسم ، الظباط اخدوها جري علي مستشفي كبيرة في المنيا تبع سيادتك، المستشفي رفضت تدخلها الا لما تدفع 10000 جم ، الظباط لو معاهم 10000 جم كانوا دفعوا ، الظباط ربنا يسترهم أخدوها علي مستشفي أسيوط الجامعي ، الحمدلله مستشفي أسيوط الجامعي قبل يدخلها ، أصله مش تبع سيادتك ، ما علينا خد بال معاليك الست نطت من شباك القسم ،وقعت في حوش القسم ،شالتها عربية البوكس بتاعة القسم ، كله تبع الحكومة راحت مستشفي تبع الحكومة رفضت تدخلها ، أكيد سيادتك عارف ومصر كلها عارفة حكاية الست اللي ولدت في الشارع ، حنقول مفيش ميزانية ودي مستشفيات مجاني ، طيب الست اللي راحت مستشفي من أكبر مستشفيات القلب في مصر ودفعت مصاريف علاج 350 الف جنيه وجت في الأخر طيارة أخدتها للخارج ، المستشفي العالمي رفضت تأخدها ، لأن الجرح بتاع العملية متلوث ، وعمل لها تسمم في الدم ، طلعوا لأهلها شهادة بتقول أن ده غلطة مستشفي ، الله يرحمها ، راحت ضحية ،عندك علم بالموضوع ده ، واحد جنايني بلدياتنا ، جت له غيبوبة سكر وقع علي الرصيف علي نفوخه ، اصحاب الشهامة والهمة اخدوه جري علي مستشفي حكومة ، كام يوم وهو في غيبوبة وربنا سبحانه ارحم منا توفاه ، اهله جم يستلموا الجثة المستشفي رفضت ،طلبت منهم 22000 جم ، الناس سابوا الجثة وراحو يستلفوا من اهلهم ، وبقالهم أسبوع لسه مرجعوش ، ولا دفنوا المرحوم ، ملقيش مع سيادتك 22الف جنيه سلف ،من أي بند ، أو من مكافأت سيادتك أو مصاريف مكتبك ، ندفن الراجل ونرجعهم قبل الميزانية الجديدة ، وعد زي وعودكم اللي حتتحقق.

إمضاء
ناجح البواب

العنوان

أول دكة علي اليمين بعد باب العمارة

وعلي الله قصد السبيل

صرخ برنجي الكمين كلمة السر ردوا ياسلام سلم
فرح الجميع بللي جاي علينا يستلم ويسلم
تعب الوقوف يهون لما زميل بضحكه يسلم
مديت يميني للزميل لجلن علي يسلم
هجم علكمين مجنون حقود والجهل جوه مليه
طلقه في صدر الزميل واقع بيتألم
قلي يادفعة وصيتك بنتي الرضيعة لعريسها تتسلم
رشم مينا الصليب وروحه لخالقها تتسلم
لقيت كتير مترمين متعورين والباقي ربنا سلم
مينا ومصطفي ورؤوف في صناديق بتتسلم
مين اللي قال ان المسيح او محمد علقتل اتكلم
ده ربنا سمي نفسه السلام وقال من اسمي اتعلَّم