ناجح البواب .. و عسل الشيخ

بقلم " د. ناصر فؤاد
وجدت "ناجح " عندما فتح الباب، وقد حمل من خيرات الله الكثير ، وقد انفرجت أساريره
ناجح : صباح الفل يا باشا ، الحاجة اللي كانت بتعيط بحرقة من كام يوم علي ابنها ، جت تحت وجايبه معاها كل الزيارة المحترمة دي ، وبتستأذن سيادتك في عنوان ونمرة تليفون الشيخ ، أدخّل الحاجه فين ؟.
العبد لله : الحاجه دي مش حتخش البيت عندي ، رجعها لها ، ومفيش نمرة شيخ ، قولها أنا الشيخ وما ينفعش كده ، اتصرف انت معاها وبعد ما تخلص ابقى قولّي عملت إيه.
ناجح : ده فيه مشلتت وزبدة وعسل وجبنة وو... ...
العبد لله : خلّص وانزل بسرعة ورد علىّ عملت إيه ، مفهوم ولا أعيد.
أسرع ناجح حاملا ما أتى به ، ثم عاد بعد حوالي 20 دقيقة وهو في قمة السعادة .
العبد لله : عملت إيه ، ومالك كده طاير من الفرح، أكيد نفحتك بقشيش وهي بتاخد حاجتها.
ناجح : من جهة البقشيش ورقة بمدنة يعني بـ 100جم ، ومن جهة تاخد حاجتها برضه قالت لي حلال عليك يا عم "ناجح" وادّتني كل الحاجة ، عندها نظر وذوق عالي ، وقعدت تدعي لسعادتك بطريقة هيستيرية ، وتوصيني عليك ، وتقول كلام على إن سيادتك ولي من الأوليا، وصاحب خطوة ، هي إيه حكاية الولية العجيبة دي، أسبوع لطم خدود ، وبعد كام يوم زغاريد ومشلتت وورقة بـ 100 ، وطالبه منك ما تكسفهاش لما تجيب لك سبوع حفيدها اللي أكيد جاي بإذن الله .
العبد لله : خلي بالك الكلام اللي حقوله لك سر ، بس بقوله علشان تعرف الحاجات دي جت ليه ، وتاخدها أو توزعها أو تبيعها انت حر، بقى يا عم "ناجح" الست دي جت من أسبوع وقعدت تستناني على الباب زي ما انت شفت ، وكانت عنيها وارمه من كتر العياط ، وقعدت تترجاني أكلم لها الشيخ "جمال قطب" هي شافته جاي يزورني كذا مرة.
ناجح : أنا شفت حالتها بس ما سمعتش قالت إيه ، كل اللي أعرفه انها ساكنه مش بعيد عننا ، وحياة حفيدك تنورني علشان الواحد يعرف الحاجة دي حلال ولا لأ، ومش حفتح بقي لأي حد.
العبد لله : ولا حاجه يا عم ، كل الحكاية جت وقالت إن ابنها اتجوز من كام يوم وان فيه واحد رابطه، يعني خلاه مش طايق عروسته وبيهرب منها من بعد الزفة وقبل الفرح ما يخلص ، وإن أهل عروسته لو عرفوا حيفضحوا الدنيا ، وعايز تكلم الشيخ علشان يفك الربط، كلمت الشيخ قال الكلام ده دجل تروح تعرضه علي دكتور متخصص وإن كان سليم تعرضه على دكتور نفساني ، طبعا لما جت تاني يوم وقلت لها ،"طيب ما تجربي تعرضيه على دكتور" ، قالت ابني سليم 100% صاغ سليم ، ما حبيتش أكسر بخاطرها قلت لها فوتي علي بعد ساعة علشان الحل جاي في السكة، عملت برطمان صغير جدا زي بتاع المربي والعسل بتوع الفنادق ، حطيت فيه عسل أبيض وكتبت على البرطمان ، عسل الشيخ ، الست فاتت بعد ساعة ، قلت لها التعليمات تتنفذ بالحرف ما فيش داعي للغلط ، ادّي العسل ده للمحروس ابنك ياخد بصباعه الصغير لحسة كبيرة وياكلها ، وبعد ساعة وربع ياخد بصباعه الكبير لحسه صغيرة ، ويدخل ياخد دش في 10 دقايق ويخرج يصلي ركعتين لله ، ويخلي مراته تصلي معاه ، وبعدين ياخد باقي العسل علي بق واحد ، وكل حاجه حتبقى زي الفل ، وباقي القصة انت عارفه ، أكيد الربط اتْفك والدنيا بقت بمبي ، والعروسة للعريس ، والفطير والزيارة والفلوس لسيادتك.
ناجح : يا مولانا الفطير والحاجه 100% حلال ، وسعادتك تستاهل تبقى ولي من الأوليا علشان فرّحت قلب أم ، بس بالله عليك ما تزعق ولا تزعل وتنفذ لي طلبي .
العبد لله : إيه طلبك.
ناجح : حجاب محبة
وعلى الله قصد السبيل