ناجح البواب .. الوزارة في السيارة

رؤية

ناجح البواب .. الوزارة في السيارة 

• §      بقلم : د. ناصر محمد فؤاد

بادرني ناجح حين رآني قادما : يا ترى رأيك إيه في الناس اللي بتقتل بعضها، وليه القادة بتوعهم ما تقعدش تتكلم سوا، وتتفاهم بدل ما تقتل بعض ؟.

العبد لله : كل واحد حر في توجهه السياسي والديني اللي شايف أن الشرعية في التحرير هو حر، واللي شايف أن الشرعية في رابعة برضه حر، المهم إننا نتكلم بالعقل والمنطق وتبقى الحُجة بالحُجة مش بالكلام ما يصحش واللي بيتكلم على رفع راية الإسلام أؤكد لك اللي حصل في مصر من سنة ما لوش علاقة بالإسلام حتى الرئاسة في عهد مرسي ما قدرتش تلغي رخص الخمور والكباريهات .. لا .. دي خلتها تجدد كل 3 سنوات مش كل سنة أو سنتين زي ما كان متبع قبل كده ، وبالنسبة للقادة بتوعهم الحكاية محاولة تمكين فصيل للحكم سواء رابعة أو التحرير هو ده بيت القصيد والناس اللي معتصمه أدوات بيستعملها كل طرف للضغط وعشان يكسب أرض للتفاوض عليها.

ناجح : ازاي جماعة قعدت 80 سنة تحلم بالحكم والسيطرة على الدولة وإنشاء خلافة ، وما فكرتش ازاي تحكم أو تنشئ خلافتها ، ولما مسكت الحكم قعدت سنة في الحكم وفشلت بجدارة بغض النظر عن الأسباب ؟

العبد لله :الجماعة بقالها 81 سنة في الكلية ولسه في تالتة بس هم لقوا الحل علشان يخلصوا كلية وعلشان كده معتصمين في رابعة وبعدها يتخرجوا.

ناجح : يعني راجعين للحكم يا باشا.

العبد لله : أنا قلت يتخرجوا ما قلتش يرجعوا ، وكل واحد يفهمها زي ماهو عايز ؟.

ناجح : هي ليه الوزارة دي الوحيدة اللي مش بتتكلم عن مكافحة الفساد ، وبقالها تقريبا أسبوع ولا جابت سيرة شفافية ولا حتي ريحتها.

العبد لله : اسمع يا عم ناجح أنا حاحكي لك حكاية وأنت تفهم منها ، كان فيه راجل مهم عنده ناسه اللي بيهتم بيهم وبيراعيهم ، اشتري عربية بحوالي سبعة ملايين ، اشتراها مخصوص عشان تخدم ناسه وتريحهم ،والناس تقول دي أكبر عربية في العالم ، لكن العربية ما كانتش بتخدم ناسه كويسه وبتوصلهم بعد ما يكونوا داخوا السبع دوخات، العربية كان فيها فيران كتيرة بتجري فيها ، وكانت بتضايق الناس ، بس الناس كانوا بيتعاملوا معاها علشان هي موجودة في العربية ، والناس كانت رغم كل حاجة حياتها ماشية ومش بتشتكي ،الراجل المهم ده قرر يجيب سواق تاني لعربيته لأن السواق الأولاني الناس كانت تعبت منه وما كانش بيعرف يتكلم كويس ،غَير السواق والسواق الجديد استلم ،السواق وبدأ يسوق بطريقته وقرف من الفيران وكترتها ،وراح جايب شركة مكافحة وقضى علي الفيران الكبيرة والصغيرة كلها ، الناس بقت مبسوطة جدا راحت تركب العربية ، السواق يدور العربية الموتور مش بيدور ، الناس نزلت تزق العجل مش بيتحرك ، العربية وقفت في مكانها ومش راضيه تتحرك ولا سنتي واحد.

ناجح : يبقى السواق الجديد غشيم وفاتح صدره وخربها.

العبد لله : لأ يا ناجح السواق راجل كويس وبيعرف يسوق ، بس لازم تعرف أن الفيران هي اللي كانت ممشيه العربية ومن غيرها العربية مش حتمشي ولا تتحرك، يعني زي الطوبة.

ناجح : يعني كان حقه ساب الفيران.

العبد لله : لا .. يشيل الفيران واحد ورا التاني ويجيب بدالهم حد يفهم ويكون مش مؤذي.

ناجح : طيب بلاها شفافية وبلاها مكافحة فساد.

وعلى الله قصد السبيل

• §       من القلب

صالح طالح سليم وعيان

شجاع جدع خسيس وجبان

محكوم حاكم مسجون وسجان

هو نفس الشخص هو ده الإنسان