ناجح البواب .."سولار ، دولار ، نار الأسعار"

رؤية

ناجح البواب .."سولار ، دولار ، نار الأسعار"

بقلم : د. ناصر فؤاد 

أرسلت ناجح لشراء بعض متطلبات المنزل، ومنها علبة صابون غسيل ملابس ، كنت قد اشتريت واحدة منها أمس ولكن ابنتي قررت الاستيلاء عليها ، ومن ثم أخذتها معها إلى بيتها ، وحينما دق باب الشقة وفتحته ، وجدت "ناجح" قد أحضر معه فاتورة الشراء من البقال على غير المعتاد ، فبادرته بالسؤال :

العبد لله : خير يا ناجح إيه الفاتورة دي ، هو البقال بقى بيدّي فاتورة ، طيب فين فاتورة السلطة من الخضري ، وفاتورة السوداني من المقلة .

ناجح : هو كده التعامل "آخرة خدمة الغز علقة" ؟!.

قاطعته محتدا : غز في عينك بجح .. صحيح مين ده اللي غز .. أنا مصري مش من الغزاة .. بس باين عليك حتاكل فعلا علقة .

ناجح : يا باشا أنت زعلت ولا إيه ، دنا دخلت معركة حامية ولا معركة الاتحادية وبورسعيد والمقطم ،علشان سعادتك وعلشان أجيب الفاتورة لجلـن تصدقني .

العبد لله : صادق يا سيدي بس على الله محدّش يعمل لك ضبط وإحضار على معركتك مع "لوبلب" البقال ، أو عم سيد الخضري ، ويعتبروهم من الأماكن السيادية .

رد ناجح : يا باشا بلاش مقلته علىّ ، ده أنا كنت بتناقش ولا حمزاوي ،  ولا معتز في زمانه علشان خاطر سيادتك ، ده لو كسينجر بنفسه ما كانش عمل اللي أنا عملته.

العبد لله : شوقتني فيه إيه يا ناجح  بك .. أو يا سيادة الناشط ناجح السابع عشر .

ناجح : مقبولة من سيادتك ، بس لما تسمع حتعرف أنا عملت كل ده ليه.، أنا يا باشا رحت اشتري الصابون بتاع الغسالة التوماتيك ، لقيته أغلى 5 جم ، وكمان شالوا من عليه الصابون السايل بتاع غسيل المواعين الهدية ، طبعا ما سكتش ، كلمة مني .. كلمة من البقال ، مسكنا في بعض وهو يحلف أن السعر زاد النهارده، علشان موضوع بورسعيد .

العبد لله : بورسعيد مالها ومال الصابون يا عم أنت، ده مصنعه في أكتوبر، أنت البقال ضحك عليك ولا إيه !

ناجح : لا يا باشا ، ما هو فيه جزء منه مستورد عن طريق بورسعيد ، والشركة زودت كل كرتونه على البقال 10 جنيه ، قال إيه علشان السولار وسعر الدولار و كمان الدولار مش موجود إلا في السوق السودا والشركة بتدوخ علشان تجيبة ، طبعا أنا ما سكتش قلت له إن الكرتونه زيادتها بالكتير 5 جنيه علشان الدولار ، السولار على الكرتونه الواحدة 5 جم ليه ، البقال الفصيح قال إن العربية النقل بدل ما تشتغل كل يوم بقت تشتغل يوم وتقف قدام المحطة يوم بالكامل علشان تموّن وعلشان كده التكلفة عالية جدا .

العبد لله : طيب الكر تونة فيها 6 علب يعني العلبة زادت "جنيه وخمسه وستين قرش" تقريبا ليه البقال زودها 5 جنيه وشال كمان من عليها الهدية .

ناجح : نفس السؤال سألته للبقال ، وكان رده أن عنده هالك وراكد وساعات علبة الصابون بتقع وتتقطع ومش ممكن حد يشتريها.

اكتفيت بما سمعت وأعطيت ناجح حسابه وهَم هو بالانصراف .، ولكن فجأة أنقطع جيب جلبابه وسقطت منه زجاجة صابون أطباق سائل مكتوب عليها بخط أحمر كبير "هدية مع صابون غسيل الملابس ،غير مخصصة للبيع" .

وعلى الله قصد السبيل

من القلب

عض قلبي ولا تعض رغيفي ..... إن قلبي علي الرغيف رهيفي ....
وانظر لجيبي خاويا متدليا ... تعرف بأني محترم وشريفي ....
ولا عمري كنت متحذلقا متعاليا .... ولا أحب أصاحب الخاين الاشكيفي ...