ناجح البواب .. وست أبوها

رؤية

ناجح البواب .. وست أبوها

بقلم : د. ناصر فؤاد 

نفحني ناجح بواب عمارتنا كوبا من شراب لوز قلت له : "هوّ الزمالك أخد الدوري" رد "ده مش مني .. ده من الدكتور جارك علشان طلع راجل من ضهر راجل رسمي، " دهشت لما قال ولكنه فسر لي سريعا "الدكتور أمه اسمها"ست أبوها هانم" اسم مركب وطلعت على المعاش بدرجة وكيل وزارة من حوالي 30 سنة ـ معاش مبكر ـ أول ما ترقت وأخدت درجة وكيل وزارة .. هوب طلعت معاش بعد ما خدمت 35 سنة في الحكومة علشان تربي أحفادها، وزوجها الله يرحمه كان كمان بيشتغل في الحكومة، ولما توفى بعد ما داخت الـ 7 دوخات خلصت الورق بتاع المعاش بتاع جوزها وكله تمام ، 8 أشهر معاش جوزها ما بيجيش ، فضلت تدور علشان تعرف المعاش ما بيجيش ليه، مدة طويلة وهي بتدوَّر .. أخيراً موظف ابن حلال قال لها يا "ست أبوها هانم" لا يجوز نديلك معاش جوزك، انت عندنا في السجلات ذكر وموش ممكن ذكر يكون متجوز ذكر زيه وبالتالي لا يستحق معاش الزوجة، "ست أبوها هانم" معاها بطاقة بأنها أنثى، وشهادات جامعة من كلية بنات وكله تمام، بس القانون قانون، مش حنصرف يا "ست أبوها هانم" ، "ست أبوها هانم" ست طيبة قالت للموظف "طيب يا إبني المشكلة دي نحلها ازاي" الموظف قال لها "ارفعي قضية على المعاشات" .. ست أبوها أخدت بعضها ونزلت على السلم زي ما طلعت أصل الأسانسير على طول عطلان بس وكيل الوزارة بيعرف يشغله هو ومكتبه سبحان الله خبرة في الحكومة ، وهي نازلة اصطادها الساعي وقال لها "انت باين عليك من لبسك وطريقة كلامك بنت ناس، وبتفهمي في الأصول، ومش حمل بهدلة ومحاكم، إيه رأيك نحلها سلمي " ست أبوها قالت في سرها أنا حاخد حقي بالقانون ، بس الساعي كمل "قبل ما تنزلي للأرضي حتكون قضيت ومعاشك رايح في الطريق للبنك" ، ردت ست أبوها "طيب إيه المطلوب" الساعي دوغري شاور لها بإيديه علامة فلوس ست أبوها طلعت 20 جم أخدها الساعي وقال "100 جم أول ما أجيب لك البرنت يعني الطباعة بتاعتك رقمك التأميني واسمك منور وقدامه لمؤاخذه "أنثي" بس حضرتك تديني بطاقتك بس وأنا حتصرف" .

نص ساعة وكان معاها كل الأوراق والتصحيح مضى عليه المدير العام ، وإذن الصرف كان بيتعمل ، لما روحت البيت حكت الحكاية لابنها وفرجته التقرير اللي بيقول إنها "ذكر" والتقرير اللي بنفس رقم التأمين ونفس التاريخ بيقول إنها "أنثي"، هو دكتور كبير قال لها طول عمرك بتقولي لي ابني راجل من ضهر راجل أهو طلعت راجل من ضهر رجالة وميري بختم النسر .... بس خللي بالك انت كده متهربة من الخدمة العسكرية.

وعلى الله قصد السبيل

من القلب

الأوله آه والتانيه آه والتالته آه

الأوله آه على نهار زي ليل كالح

والتانيه آه على ولدي اللي كان فالح

والتالته تقرير طسته عربيه

والرابعة يابلد نهرك عكور مالح