ناجح البواب .. رمضان كريم

رؤية

ناجح البواب .. رمضان كريم

بقلم د. ناصر فؤاد

حضرت إلى العمارة بعد غياب لسفر إلى المصيف ، فوجدت إحدى الشقق وقد تفحمت تماما من أثر الحريق ، سارع إلىّ "عصام أبو الندا" و"ناجح" وحمل "عصام حقيبتي وأسرع بها إلى شقتي ، بادرني ناجح "كل سنة وحضرتك طيب وربنا ما يقطع لك عادة حمدا لله علي السلامة" .

سألته "إيه اللي حصل يا ناجح إيه اللي حرق الشقة دي ، وهل أثرت على العمارة" .

رد ناجح "الشقة بتاعت الأستاذ ولاء حصل فيها ماس كهربائي ، تاني يوم ما حضرتك سافرت ، التكاييف كلها كانت شغالة ، هوب العداد ولّع بعد الأسلاك ما ساحت من الأحمال ، شرارة جت مع الغاز الشقة ولعت في ثواني، والحمد لله هو كان في الجناح التاني من الشقة وعرف يخرج هو والأولاد والجماعة ، لكن النص اللي على الشارع راح بالكامل " سألت ناجح " لا حول ولا قوة إلا بالله ، يا عم ناجح ده لسه موضب الشقة ما فيش من شهرين ، ومغيّر كل حاجه فيها تقريبا ، ربنا يعوض عليه" .

رد ناجح "هي دي المشكلة ، المقاول اتخانق مع الكهربائي لأن طلباته كتيره وغاليه ، والمقاول طرد الكهربائي وكمل بالصبيان بتوعه ، وركبوا أسلاك أرفع من اللازم ، ولا مواصفات ولا أي حاجة وكمان الكهربائي البلية وصل كل التكاييف على خط واحد ، فالدنيا ولعت وكله راح، بس الحق يتقال الأستاذ ولاء جاب صنايعيه عشرة علي عشرة بعدها بخمس أيام ، أصل المطافي اللي جت بعد ما السكان خلصوا على الحريقه بالطفايات بهدلوا الشقة علشان يبردوها".

 أعجبني أن أجد أحد أفراد الشعب يؤمن بالمواصفات وخاصة ناجح وسألته "طيب يا عم ناجح انت ليه مش بتطبق المواصفات علي نفسك في أنبوبة البوتاجاز اللي انت حولتها عين وبتطبخ عليها ، ولا في موضوع النظافة" طبعا ناجح كمن لم يسمعني وأكمل حتي يهرب من سؤالي "في البداية اشتغل العمال بهمة والأستاذ ولاء كان مبسوط بس أول ما جه رمضان الحكاية اتلخبطت والشغل بقى مش ولابد" زاد فضولي وسألته "ازاي يا عم ناجح يمكن علشان وقت العمل في رمضان قصير ، أو واخدين الشغل مقاولة فبيريحوا في رمضان "

عرف ناجح إنني لن استطرد في موضوع أنبوبة البوتاجاز فأكمل حديثه مطمئنا "لا يا باشا الأستاذ ولاء بيحاسبهم باليومية وكمان بيفطرهم على حسابه من أكل أهل بيته ، بس هم بييجوا الساعة عشرة الصبح يغيروا هدومهم ، ويخشوا يتوضوا ويشتغلوا ساعة ، وبعدين حضرتك عارف رمضان شهر بركة وعبادة ، صلاة الضحي ، وقراءة جزء من القرآن ، وبعدين صلاة الظهر نص ساعة ، وبعدين ساعة شغل ، وقراءة في القرآن وصلاة العصر ، وترييحه نوم لحد المغرب ، والفطار والشاي والحلو ، وبعدين على طول يروحوا" رددت مستغربا "وفلوس اليومية كده تبقى حلال " ضحك ناجح ورد "رمضان كريم" 

وعلى الله قصد السبيل..