" ناجح البواب ".. العصافير والجرجير والجمرك"

رؤية

" ناجح البواب "..  العصافير والجرجير والجمرك"

بقلم : د/ ناصر فؤاد  

شاهدت ناجح في أثناء سيري بالسيارة في الطريق يحمل دراجته علي كتفه متوجها بها إلي محل لأصلاحها ، فناديت عليه لكي يركب معي ، ويضعها فوق السيارة ، إلا أنه رفض بأباء وشمم مرددا "أنا راجع مش رايح أصلحها عند العجلاتي" ، وعند عودتي مساءا ، وجدت الدراجة مفككة وقد أصبحت العشرات من القطع ، فتعجبت وسألته "الله عليك أستاذ في الفك ‘ بس ساعة التركيب ‘ ربنا يستر ‘ وترجع عجلة " ضحك ناجح ومسح عرقه من جبهته رغم برودة الجو ، فترك شحم العجلة اثر أصابعه علي طاقيته وجبهته وقال "طيارة بأذن الله " تعجبت لثقته الزائدة رغم عدم معرفته أصلا بكيفية تركيبها فقد أعطاها أياه جارنا الثري السوداني الذي حضر لمدة 45دقيقة بمطار القاهرة بعد أن كان قد أرسل حقائبه وتلك الدراجة قبل حضوره ، ولكن الجمارك المصرية رفضت دخوله وبصحبته مبلغ 150000 دولار أمريكي ،أحضرهم لشراء شقة وتأثيثها بأثاث مصري من دمياط ، ورفض هو البقاء في مصر ،وأتصل بناجح يبلغه الغاء صفقة شراء شقة وسط البلد ، ويبلغه بأنه سيصفي أعماله بالقاهرة ولديه من تجار الجمال من سيسلمه كافة أمواله بالخرطوم، فقلت لناجح "ياعم ناجح هو انت بتفهم حاجة في العجلة علشان تحولها لطيارة ، ده يبقي كويس لو رجعتها عجلة تاني" رد ناجح "يعني هي كلمتي ياباشا هي بس اللي مش عاجبه، طيب ما هو كل اللي ليه واللي مالهوش بيفتي ، هو الكلام عليه دمرك" رددت عليه "لا ياسيدي مفيش عليه جمرك ولا حاجة، بس الراجل بيتربط من لسانه، يعني حتبقي عيبه في حقك" ضحك ناجح "ياباشا هو أنا أول ولا أخر واحد حيقول كلام ويرجع فيه ، علي الأئل أنا بتكلم في مالي، مش في مال غيري، الراجل طلب يرجع اليهود مصر ،حد من المسئولين قال له ، عملت كده ليه" قاطعته "يا ناجح الراجل كان عايز يحل مشكلة فلسطين ، فقال لليهود كل واحد يرجع بلده بما فيهم يهود مصر، وكده تبقي فلسطين فاضية ، والمشكلة تتحل" قاطعني ناجح "فاضية وهم حيأجروها مفروشة ، ولا قانون جديد، والله العظيم أنا لو من الريس كنت خليتك ، تبقي معاه أو في الحكومة، بتعرف تتطلع الجزء الكويس من الكلام وتبروزه ، حتي لو كان الكلام يودي في ابو نكلة، بس مشكلة الراجل اللي اتكلم أكبر من اللي قاله، المشكلة هو بيتكلم عن مصر والمصريين بصفته أيه ، ولا الحكاية بقت " وجدت أن الحديث تطور واتخذ أتجاها قد يحدث أشكالية ، حيث أن بعض سكان العقار قد حضروا فقاطعته مغيرا الموضوع "طيب يا خبير استراتيجي سياسي تنموي، ممكن تبقي تجيب تموين العصافير ،والبغبغنات وتحاسبني" رد ناجح "ماشي ياباشا اللب السوري علشان البغبغانات بتاعة سيادتك جبته الصبح، أما سبيل العصافير بتوع الشارع اللي حضرتك بتحطه ، فتعمل حساب سيادتك انه زاد النهاردة 30% وعلشان كده مجبتوش" قاطعته "زاد أزاي أنت الأسبوع اللي فات جايبه ب5جنيه عايز تفهمني انه النهارد ب6.5 خلاص نبقي نجبله جرجير، وأهو أحسن للصحة" رد ناجح مبتسما "ياريت يرضوا " استغربت "مين دول اللي يرضوا ، هو العصافير حتاكل جرجير" قاطعني "لا ياباشا النسوان بتوع الجرجير والخضرة رفعوا الأسعار 100%، ولما سألتهم ليه قالوا أشمعني الدولة رفعت سعر الدورار" قاطعته "أيه التخريف ده ، وهم ماله ومال الدولار" قاطعني مرة أخري "ماهو ده اللي قلته لهم بالحرف ، وقلت لهم أكبر مسئول في الدولة قال أن الأقتصاد سليم وزي الفل" أعجبني رده عليهم فقلت له "وبعدين" رد ناجح "ياباشا لا مؤاخذه قالوا لي واضح ان انتم مش عايشين في البلد دي، ولو عايز تشتري جرجير ، خلي المسئولين بتوعك يجيبوا لك شوية أقتصاد قوي من بلدهم، علشان تعرف تشتري الجرجيربالسعر القديم"

وعلي الله قصد السبيل

• §     من القلب

بيقولوا علي ده طيب ... وساعات بيقولوا عجيب
اكمن انا قلبي رهيف .... والدمع لعيني قريب
فاكرين لو يلهفوا حقي .... بسرعة راح اجري وسيب
ابدا جويا لو بصوا... دنا راضع لبن الديب