ناجح البواب " شورى النوساني"

رؤية

ناجح البواب  

" شورى النوساني"

بقلم : د. ناصر فؤاد

اللي ما يعرفش ناجح البواب ، بسرعة أحب أعرفه على شخصية مصرية فريدة ولكنها متكررة ، زي "ما عرفش بس متأكد" ، ايجيبشن ستايل ، ناجح اتولد في قرية لزق في مدينة سياحية من الدرجة الأولى تلاقي فيها كل الأطفال والكبار والحريم بيتكلموا أو بيرطنوا 4 أو 5 لغات لكن مفيش حد فيهم إلا فيما ندر يعرف يكتب لغة تانيه أو أكتر غير العربي  .

 و ناجح المطعين وده اسمه من الأشراف ، أتم دراسته الثانوية الأزهرية وبعد كده أخد دبلون "زي ما هم بيقولوا" سنتين فني كهربا ، وأول ما خلص تعليم اتعرف على خواجه بيشتغل في شركة مقاولات عالمية واخده مقاولة في السعودية ، والراجل أعجب بجدعنة ناجح فشغله معاه بعقد في الشركة ، ولما خلص مشروع السعودية راح مشروع تاني في ليبيا ، عمل قرشين كويسين وكعادة أهل القرية ، بني بيت في أرضهم واشترى أرض فيها نخل ، واتجوز واحده أخت زميل له من ليبيا ، بس معمّرش معاها ،طلقها بعد ما كان جاب منها ولد ، وبعد ما سابها أو سابته لما فلوسه قربت تخلص، اتجوز بنت عمه ، وخلف منها ولد وبنت ، خاله كان بيشتغل بواب في القاهرة  .

ولما توفي نزل "ناجح" مصر علشان الشغلانه ما ترحش لغريب ويحفظها لولاد خاله ، ولاد خاله معجبتهمش شغلانة البواب واستعروا منها ، لكن ناجح عجبته الشغلانه وعجبه التعرف على الناس والتعامل معهم وعجبته القاهرة أكتر ، وداب في المدينة ودابت فيه ، بقى قاهري منتمي إلى قريته بشدة ، ولا يقدر يبعد عن القاهرة ولا يقدر يبعد عن قريته ، تركيبة مش موجودة إلا عندنا في مصر.

قدري إنه البواب بتاعي ، ومن يوم ما جه بدل خاله ، وعرف إني وقفت مع خاله لما كان عيان ، واني أنا اللي صليت عليه لما مات ، نشأت بينا معزة ومودة خاصة ، بالظبط زي ما يكون عندك عامل كويس أو موظف انت بتحبه .

كده متهيأ لي أنكم عرفتم صورة سريعة عن "ناجح" ، المهم "ناجح" اصطادني وأنا نازل من الأسانسير ، وسألني "إيه رأيك في شورى النوساني" طبعا أنا ما فهمتش هو بيقول إيه فسألته " وده اسم راجل ولا ست " ضحك ناجح جدا وقال "يا باشا أنا بسأل سعادتك عن رأيك في فيلم "محامي خلع" هاني رمزي كان اسمه "بدر النوساني" وأبوه كان العمدة والفيلم كان فيه جلسة صلح أو قعدة حق عرب لما عيل مش متربي من عيلة فارس اتفرج على الوليه لطيفة مرات عوض أبو شقفة  اللي لا مؤاخذة كانت بتغسل المواعين على الترعة ، وقانون البلد قال إن عيلة فارس تدفع حق فدان أرض لعيلة أبو شقفة ، إنما العمدة قرر أنه يستشير ابنه المتر بدر النوساني اللي راح راقع فتواه بتاعة إن الست اللي بتغسل أو الضحية هي السبب ، والعمدة غير الحكم وخلاه أن المجني عليه يدفع للجاني "  .

طبعا أنا ما ستحملتش على الصبح إنه يوقفني ويحكي لي فيلم شفناه عُشرميت مره "طيب يا فالح أقصد يا ناجح عرفنا الفيلم رأيي في الفيلم عايزه ليه" : رد ناجح بسرعة " يا باشا يا دكتور انت فاكر إني بتكلم عن الفيلم أبدا أنا بس افتكرت الفيلم لما ، لجنة حقوق الإنسان وقف عضو فيها وقال إن الضحية المتحرش بيها هي السبب في التحرش ، واضح انه هو اللي كتب فيلم محامي خلع ، لأن فيه من الستات اللي اتبهدلت من التحرش منقبات وستات عندهم 70 سنة وبنتات محجبات ، تخيل يا باشا مجلس الشورى بالطريقة دي ، هدم قانون العقوبات على دماغ المصريين نفس ـ نظام النوساني ـ بس أنا خايف يا باشا جدا " رددت عليه "خايف من إيه يا عم ناجح " رد ناجح " خايف يكون فيه واحد تاني بيحب آخر مشهد من فيلم "العار" بتاع شقا عمري ضاع والدفاس وأبو دهشوم وفسواني والملاحة الملاحة وحبيبتي ملو الطراحة  .... حسرة علينا يا حسرة علينا" .

وعلى الله قصد السبيل