أكل ومَرعى وقلة صنعة

ناجح البواب 

أكل ومَرعى وقلة صنعة

بقلم " د. ناصر فؤاد

حالتان وملحوظتان خلال هذا الشهر الكريم رصدهما ناجح : يا باشا أنت مش ملاحظ حاجة السنة دي في رمضان .

العبد لله : غير وساخة مدخل العمارة والسلم وأن صيانة الأسانسير متعملتش الشهر ده ، وانك طالع نازل زي المنشار ، والباقي بيختفي طول ما أنا مسألتكش عليه ، مش أيها حاجة ملاحظ .

ناجح : يا باشا الله يسامحك ، سعادتك شادد علىّ جدا ، ما هي المعايش صعيبة جدا اليومين دول ، وطول عمر سعادتك بتدينا نفحات الشهر وبعدين أدوش دماغك ليه بفكة ملهاش عازة ، وربنا يكرمك ويبارك فيك .

العبد لله : سيبك من الهمبكة دي وقول اللي أنت ملاحظة وشئ خطير وفي رمضان ،وبعدين حنرجع لموضوع النظافة والصيانة.

ناجح : سعادتك مش واخد بالك أن الشحاتين قليلين قوي السنة دي عن كل سنة ، حتي عدد الكناسين قل جدا ، ده بيقولوا إن سعر بدلة الكناس والمقشة نزل من 400 جم وبقي بـ 200 جم ومش لاقيين حد يشتري، السنين اللي فاتت كان بيقف عليها طوابير وبالخناق وما فيش إشارة واحدة إلا وتلاقي عليها كبشة كناسين على شحاتين على بتوع المناديل ، ولعب العيال ، كل دول اختفوا السنة دي .

العبد لله : تصدق إن عندك حق ، يا ترى راحوا فين ، مش ممكن يكون معز الشهدي ولا نيازي سلام بتوع "بنك الطعام " جابوا نتيجة هايلة بسرعة دول بيقولوا 2020 حنقضي على الجوع يعني لسه بدري ، طيب يافيلسوف عصرك وأوانك تفسر قلتهم السنة دي بإيه.

ناجح : شوف سعادتك ومن غير لف ودوران ، حفسر لسعادتك سبب قلتهم وكمان سبب نظافة السلم وسبب عدم صيانة الأسانسير ، السلم كل يوم بنضفه بنفسي ، لأن العيال اللي بييجوا يشيلوا الزبالة مش بييجوا والمعلم هو اللي بييجي يشيلها وبيوقع طول مهو ماشي من القفة ، أصله هاوي مش محترف زيهم ، وكمان العيال اللي كانوا بيساعدوني في مسح السلم مختفين كلهم ، والراجل بتاع الصيانة كمان مختفي ، زي الشحاتين والكناسين وبتوع المناديل وبتوع اللعب والبلالين.

العبد لله : أنت بتمط في الكلام وبطَّوِّل فيه هو أنت فاكر إنك حترد على في مسلسل 30 حلقة ، أنا أساسا طول رمضان مش بشوف مسلسلات ، ولو فضلت حسيبك وامشي ، خلص يا عم السيناريست.

ناجح : اوع يا باشا سيمارتس دي تكون لاسمح الله شتيمة.

العبد لله : سيما رتس دي سيما درجة تالته ، مش قلت لك انك بتعيد وتزيد ، سلاموا عليكم

ناجح : لا والله بس الواحد بيستفسر  يعني يكون الفهم على ميه بيضه، والموضوع والسر كله في الشحاتين والزبالين والعمال والصنايعية ، كلهم شغالين عند المرشد والبلتاجي وصفوت حجازي .

العبد لله : انت بتخرف تقول إيه كل دول بيشتغلوا عند الإخوان.

ناجح : آي والله صدقني ، كل البشر دي راحوا رابعة العدوية ، يسلموا البطاقة ويخشوا الاعتصام وكل يوم يقبضوا 200 جم ووجبتين ومشاريب وكله تمام ، يعني أكل ومرعى وقلة صنعة ، وفيه منهم اللي جاب عياله كمان والعيل باين بـ 50 جم والست بـ  1000 جنيه في الأسبوع .

العبد لله : إيه الجنان ده ، انت مصدق الكلام ده ، وعرفت من فين ، وبعدين على كده الاعتصام ده بيتكلف كام مليون في اليوم.

ناجح : عرفت من فين سهلة  طلبت العيال اللي بييجوا يمسحوا السلم وقالوا لي إنهم هناك بس محبوسين ومش عارفين يخرجوا ، وبيصرفوا كام مليون ، مش فارقة ماهي فلوس الأمريكان كتير.

العبد لله : بلاش كلام من غير دليل ، كل الدليل قال وقلنا ، ولما المكسب كبير كده ما رحتش ليه يا ناجح.

ناجح : سببين ، أولا الداخل مفقود والخارج مولود ، أول ما تسلم بطاقتك وتقبض ما تعرفش تخرج ولا تعرف تاخد البطاقة ، ثانيا المنافسة الأجنبية شديدة والأسعار بدأت تنزل ، أصل السوريين دخلوا وبيقبلوا نص التسعيرة .

وعلي الله قصد السبيل

• §      من القلب

وجوه كتيره في الميدان عارفها وعارفاني

ولا تفرق معانا انت مسلم ولا نصراني

مد إيدك وحطها فـ إيدي تكسب

ده في كل ميدان اللمة عاجباني