ناجح البواب .. س و ج

رؤية

ناجح البواب .. س و ج

بقلم : د/ ناصر فؤاد 

بسبب حظر التجول ،ومحاولة مني الابتعاد عن الإعلام وما يبثه من صور ومشاهد كلها قتل وعنف وتلوث بصري ، وبسبب سفر زوجتي ، لم أجد بد من أن استدعي ناجح وأحاول أن اتبادل معه أطراف الحديث ، الا انه كعادته هرش في رأسه تحت طاقيته وسألني .

ناجح : أيه رأيك في صور المرشد واعضاء الجماعة واللي معاهم بعد القبض عليهم.

العبدلله : رأي في أيه ، تفتكر أن الصور دي فنية أو مرسومة بالزيت ، اللهم لا شماته ، انا ضد انهم يصوروا أي متهم مقبوض عليه ويعرضوا صوره الا بعد موافقته شخصيا ، الحكاية فيها مهانة كبيرة لهم .

ناجح : ياباشا دول حرضوا وقتلوا ناس كتير .

العبدلله : وهي الصور دي عقاب ، اللي عمل حاجة غلط يحاسب عليها في دولة القانون بالقانون ، ولا حتعمل زي شريعة الغاب ياناجح ، أنت شايف البلد حالها ايه من أن كل واحد فاكر نفسه قاضي ومنفذ أحكام ، دي هي دي اللي بيسموها فوضي ياناجح.

ناجح : يعني قتل 25 مجند في رفح وقتل عدد كبير في أسوان وقتل عدد زيه في كرداسة يبقي زي واحد قتل واحد في خناقة.

العبد لله : القانون عنده تدرج في العقوبة ، بيزود العقاب حسب الجريمة ، وبعدين أنا شخصيا ضد قتل أي شخص او مخلوق الا بالحق ، اي قتل انا ضده سواء كان أخوان أو من الجيش أو من الداخلية أو من أي جهة أو جنسية ، أنت شايف الشهداء من جنب واحد وهم شايفين متهمين اتقتلوا في أبو زعبل وفي الاعتصامات كل واحد شايف بعين واحدة، في ناس كتيرة جوه مصر وبره مصر مش مع اي فريق هي ضد قتل اي انسان واللي بيتذاع هنا في مصر غير اللي بيتذاع هناك في الخارج كل واحد واخد جنب واحد بس ، اعلامنا فضل سنين يكذب علينا خلانا نروح لاذاعة لندن وبعدين قنوات بي بي سي وسي ان ان وبعدين الجزيرة والعربية ودلوقت لو بيقول اعلامنا الصدق صعب ان ناس كتير تصدقه.

ناجح : أحنا بنشوف اللي بنتفرج عليه في التلفزيون ، ومبصدقش باقي القنوات لأنها يتقول كلام غلط ، مثلا قالوا مظاهرات أمام محافظة القاهرة وأنا كنت ماشي من هناك ومفيش ولا مظاهرات ولا حاجة ، طيب ايه رأي سعادتك في أن حسني مبارك بعد 30 سنة فساد وتبويظ في البلد أخد براءة من كل التهم.

العبدلله : علي فكرة هو ما أخدش براءة هو افرج عنه ، ومن أول يوم لمحاكمته راهنت علي انه حيفرج عنه بقوة القانون بناء علي تحليل الدكتور حسام لطفي أستاذ القانون وبناء علي أقتناعي أنا شخصيا بأن الموجة الغاضبة لا تؤثر علي أحكام القضاء فالقضاه بيحكموا بالادلة والبراهين الثابتة لا بالكلام المرسل حتي وان كان في أعتقادهم عكس ذلك لا علاقة للأحكام بالسياسة ولا علاقة بالسياسة بالأحكام سواء حكم عليه أو لا ده لا يعفيه من أنه كان بأمكانه أقصاء أبنه والحشاكيل وتجنيب مصر البلاوي دي كلها ، بقولك ايه يا ناجح تاكل معايا كباب علشان يبقي عيش وملح وعلشان تعرف أن فيه ديمقراطية.

ناجح : باشا بما أن فيه ديمقراطية يبقي ناكل طعمية لأحسن أتعود علي الكباب ، والديمقراطية المصري ساعات كتيرة بتبقي طعمية سادة باردة بايته من غير طحينة ولا سلطة ولا حتي طرشي.

وعلي الله قصد السبيل

• §      من القلب

طوبة علي طوبة والثورة منصوبة ... ثورة بطلها حبيب ومصر محبوبة

طوبة علي طوبة والثورة منصوبة ... اوعك تكون فاكر انك بقيت سيد

ولا تكون فاكر لعقولنا ح تقيد ... احنا كبرنا خلاص وعرفنا ايه عايزين

معدش يجدي معانا لابس عباية الدين