ناجح البواب الجنة بـ SMS

بقلم : ناصر أفندي فؤاد

الشعب المصري العظيم
السلام عليكم
أنا عارف إن الشعب المصري من أكثر شعوب العالم تدينا وأن كل الشعب نفسه يدخل الجنة بس الجنة عايزه عمل مَش أمل وبس ، في ظاهرة منتشرة الأيام دي ، زي صك الغفران بتاع القرون الوسطى ، صك الغفران كان بيتباع في أوروبا يمسح الخطايا ويدخلك الجنة .. وكله ضحك علي الدقون ، الأيام دي الحكاية مودرن شويتين .
بقوا بيستخدموا التواصل الاجتماعي علشان يضحكوا علي الناس ، تيجي لك رسالة وآخرها إن ربنا والعياذ بالله وعد اللي يبعتها لعشرة يدخل الجنة .. سبحان الله يعني واحد يقعد يلخبط طول حياته ويعمل مصايب وبعدين يبعت ١٠ رسايل يدخل الجنة ، الحاجة الوحيدة اللي بتحصل إن فلوس بتدخل لشركات الاتصالات ، عارف يشعب الموضوع ده بيفكرني بحكاية قديمة حصلت لشيخ كبير .
اتصل راجل بالشيخ وقال له أنا ضامن إني أدخل الجنة ، والشيء الوحيد اللي خايف منه إن مايكونش فيه كورة في الجنة ،أصل أنا يا مولانا بموت في الكورة ، الشيخ اتغاظ جدا جدا جدا وقال للراجل سيب نمرتك أكلمك بعد ما أبحث في الموضوع ، بعد يومين الشيخ اتصل بالتليفون بالراجل ، وقال له "ألف مبروك أنا شفت لك رؤيا ، في فرق أقوى من البرازيل وفِي فريق نجوم العالم كمان في الجنة ، ٌوانت مهاجم فريق نجوم العالم ، الراجل انبسط جدا وبكي من الفرحة ، الشيخ قالوا بس استعد عندك ماتش بعد بكرة في الآخرة.

وعلي الله قصد السبيل
ناجح البواب
أول دكة علي يمين باب العمارة جنب تلاجة الحاجة الساقعه