سيدي المحترم

بقلم / ناصر أفندى فؤاد

السلام عليكم ورحمة الله وبركاته ..
انا اكيد مش بفهم في الاقتصاد زيكم ولا في الاستثمار زيكم اكيد ولا في الكلام اللي زي البيئة الداعمة ولا مناخ الاستثمار ولا ولا ، بس يمكن بفهم في الزراعة شوية ، علي العموم الموضوع وما فيه ان احنا بنعمل استثمار الموز ، ايوه شجرة الموز او استثمار يا فيها يا خفيها ، طبعا مش عاجبك كلامي بس والغالين عندك تقرا للاخر وبعدين اعمل اللي انت عايزه ،
شوف يا سيدي انا اشرح لك موضوع الموز ، شجرة الموز اسمها قاتل ابيه ، علشان شجرة الموز بيطلع منها شجرة صغيرة الشجرة الصغيرة تموت الشجرة الاصلية اللي جابتها اصلا وهكذا واحدة تطلع تموت اللي جابوها ، احنا كده بدل ما نطلع شجر كتير بنطلع شجرة تاكل الشجرة اللي موجودة عندنا ، .
ومش بس كده الموز بياخد ميه كتير جدا واحنا اساسا عندنا مشكلة في الميه ، يعني بنستهلك ميه كتير وبنموت بعض شغالين بنظام يا فيها يا خفيها ، اكيد حتقول اني بخرف، طيب اوضح اكتر بس بكلام من الجرايد .
جرنال نشر وقال اننا بنتفاوض مع تاني اكبر شركة في العالم علشان تورد لنا مصنع وكلنا استبشرنا خير لان عندهم خبرة كويسة ، واحنا تجاربنا مع الشركات المصرية ، مش بكفاءة الناس دي ، الخبر قال ان المفاوضات في اخر مرحلة قبل التوقيع ، يطلع خبر من شركة خسرانه ومعندهاش خبرة تقول احنا اجتمعنا بأصحاب المصنع وحتعمل شركة مع مستثمر من واق الواق علشان نورد المصنع .
طبعا الشركة الاجنببة توقف اي تعاقد معانا وتعتبرنا نصابين ، واصحاب المصنع بعد ما سمعتهم باظت بالكذب معندهمش حل الا انهم يا ياخدوا مصنع خرج بيت من بتوع الواق الواق يا يبطلوا صناعة ويشيلوا فلوسهم في البنك يا يرجعوا يجروا ورا الشركة الاجنبية ان الجرنال اتضحك عليه بخبر كذب وطبعا الشركة الاجنبية ، حتطلب ضمنات تقطم وسط اصحاب المشروع .
انا عارف اني مش بشرح كويس تقول ايه بواب عمارة ، بس بجد ارجو انك تحل المشاكل دي ، علشان يبقي عندنا مصداقية. اخيرا سوف اترك لك هذا الخطاب مع سكرتيرتك لاني عرفت انك في بلاد الواق الواق بتتفق مع شريك المحروس ابنك وعلي الله قصد السبيل ناجح البواب اول دكة علي يمين العمارة جنب تلاجة الحاجة الساقعة .