 خطاب إلي " سوف "

 بقلم : ناصر أفندي فؤاد

الي كلمة "سوف " ...
السلام عليكم ورحمة الله وبركاته سيادتك عارفه انت مسئولة عن إيه ولا مَش عارفه ، انت مسئولة عن أحلام ملايين الناس اللي ضاعت لأنهم صدقوا سوف ، انت مسئولة عن كل واحد عمل مشروع وفشل لأنه لسه مستني سوف .
يا سيادة كلمة "سوف " ، اوعي تعتمدي على ضعف ذاكرتنا وأننا سوف ننسى ، اوعي تفتكري إن كلنا متعلقين بسوف ، فيه ناس كتيرة وأكتر مما تتصوروا بطلوا يصدقوا أي حد يقول سوف أو يبدأ كلامه بكلمة في الحقيقة أو في الواقع .
علي فكرة كلمة "سوف" ممكن تستغل في غير التسويف ، مرة زمان كان فيه أزمة ونقص في الدقيق وكتبوا في الجرنال علي لسان مسئول ان الدقيق ابتداء من غدا سوف يتوافر في كل منافذ التوزيع ، والواحد كان لسه جديد علي سوف ، استنيت لحد ما الصبح طلع ورحت علي منفذ كبير لقيت الموظفين قاعدين بيتشمسوا ولا على بالهم .
طلبت من واحد فيهم كيس دقيق ، رد وقال مفيش يا سيدنا ، قلت له يا استاذنا ده المسئول الكبير قال غدا سوف ... الراجل مخلانيش أكمل قال لي وحياة والدك ما تفقعش مرارتي ما عندناش ، وعلى العموم روح خد من الجرنال مَش هو اللي كاتب ، كان قاعد جنبه راجل عجوز قال لي اسمع يا ابني ، كان فيه دكان عطار في شبرا قرب الدوران ، صاحب الدكان كان كاتب يافطة بتقول "اليوم كاش وغدا سوف نبيع ببلاش" راح واحد اشتري منه وتاني يوم راح ياخد الحاجة ببلاش ، صاحب الدكان قال له اللي ببلاش بكرة ودفعه ثمن الحاجة .
تاني يوم كررت نفس الحكاية ، الراجل اتجنن وسأل صاحب الدكان "هو احنا النهارده ولا بكره" رد عليه صاحب الدكان وقال له " إحنا دلوقتي يا أستاذنا ويوم بكره عمره ما بييجي بيفضل بكرة " .
عزيزتي كلمة " سوف " ، أنا عارف إنك لازقه فينا بقالك زمان جدا ، عارف إنها عشرة طويلة ، بس مَش يعني يبقى أحسن لو حليتي عنا وخلصنا منك ، نفسنا بقى في كلمة عملنا كذا .. نفسنا نبطل كلمة سوف نعمل ، "سوف" دي زي بكره اللي عمره ما بييجي.
ملحوظة أرجو أن لا يكون الرد علي جوابي بكلمة " سوف " .
.. وعلى الله قصد السبيل
ناجح البواب أول دكة علي يمين مدخل العمارة جنب تلاجة الحاجة الساقعة .