عايدة

 بقلم / ناصر افندى فؤاد

كل سنة جديدة وكل ميزانية بتتعمل افتكر زميلتنا عايدة اول ما اشتغلت في بنك مصر في ٢٦ يناير ١٩٨٠ ، سئلوا كل المتقدمين عن رغبتهم في أنهم يرغبوا في العمل مع الجمهور مباشرة او في إدارات خدمية ، وبما اني من عائلة بنكية ابا عن جد عن عم عن ولاد عمة طبعا طلبت اني اشتغل في إدارة خدمية خوفا من الفلوس واللي بيحصل من عجز بسبب غلط او اي شئ المهم اشتغلت في إدارة التصدير .
وكانت رئيسة القسم مني الياس وكانت الراجل الوحيد او الولد الوحيد زي ما مدام مني كانت بتقول لانها كانت تعرفني من وانا بشورت لان والدي بيشتغل في نفس البنك بس علاقتي به في العمل انقطعت تماما بناء علي أوامره من يوم تعييني في البنك ممنوع أزوره في مكتبه ولي شغل يطلب منك تنفذه واوع تقول انك ابني وعلي الرغم من ذلك كل المديرين الكبار في البنك كانوا يا بيندهوني يا محسن علي اسم المرحوم ابويا او يا ابن محسن .
المهم كان معانا ناهدة ونجاة و أمينة وعايدة ، كانت عايدة من اسوان او السودان خريجة دبلوم تجارة وكان في الوقت ده خريج دبلوم التجارة لا يقل عن كلية التجارة الا انه مَش متخصص قوي بس كان خريج الدبلوم بيعرف آلة كاتبة عربي وإنجليزي وعندهم سرعة كبيرة في الكتابة . المهم عايدة كانت فاهمة جدا ومنظمة جدا وكل يوم تعمل احصائية بالشغل وتراجع عدد الملفات اللي خرجت من الشانون او الدولاب وتتأكد من مفيش حاجة ضايعة وده طبعا بالاشتراك مع مني الياس وكلنا بس هي اللي كانت واخدة التنفيذ ، وكل اسبوع احصائية وكل شهر احصائية ، .
قبل الميزانية في نهاية شهر ٦ ، كل قسم كان بيتفق مع بعضه مين يبات في البنك ومين يدور علي الملفات ومين يعمل والستات بتتفق مين ياخد عيالها ، الا قسمنا كان كل حاجة جاهزة من اول يوم كل اللي عملنا عملنا جرد للملفات وقفلنا السنة وسلمنا شغلنا واخدنا اول يوم في السنة المالية اجازة . ياريتنا كلنا زي عايدة في النظام والتوقع والتحضير واتقان العمل ، ويارتنا كلنا زي مني الياس عمرنا ما حسينا انها ريسة بس كانت ريسة علي حق.
... وعلي الله قصد السبيل