ناجح البواب هاتوا حقي منهم

بقلم : ناصر أفندي فؤاد

السيد المسئول الكبير
السلام عليكم ورحمة الله وبركاته
مرسله لسيادتكم ناجح البواب ، من باب العلم بالشيء لا أكتر ولا أقل ، عايز من سيادتكم رد يبرد ناري ، أنا جات لي فاتورة الكهربا ٢٥٠٠ جم عن شقة مقفولة في حته مقطوعة اشتريتها من سنين ،ساعات لما ناس من البلد ييجوا يزوروني وحيطولوا أقعدهم فيها ، وكل شهر بروح الشقة ادفع اللي علىّ ،عادة الكهربا كانت بتيجي ٢٠ جم ويوم ما تبقي كتير تيجي بـ ٦٠ جم ، الشهر ده جت ٢٥٠٠ جم ، ولما سألت قالوا فروق والشركة بتخسر والناس بتسرقنا ، يا كبير هو اللي بيسرق يتساب ويتمسك اللي بيدفع ، قدام البيت كشك سجاير ما عندوش عداد وعنده ٤ تلاجات وواخد الكهربا من العمود ، عيني عينك ، والقهوة اللي بيقعد عليها خلق كتير تلات أرباع كهربتها شمال ، اللي مجنني إن المسئولين بيعدوا طول النهار علي الكباري وشايفين بتاع الحلابسه وبتاع الترمس واللي عامل نصبة شاي ، يعني كل دول سارقين كهربا وأنا اللي بادفع الفاتورة ، طيب دول بيدفعوا ضرايب طبعا لا يعني ولا ضرايب ولا كهربا ، سيادة المسئول الكبير ، أنا عارف إن مسئولياتك كتير وإن أنا بوجع دماغك ، لكن صدقني لو الناس اللي في الحكومة قاعدة علي المكاتب ما بتعملش حاجة وبتقبض مرتبات ، ينزلوا يجيبوا فلوس الدولة ، صدقني مش حنحتاج نستلف ولا ندور علي ضرايب جديدة، أساسا لو هم اشتغلوا بأمانة وبطلوا يزوغوا وبطلوا يقولوا علي قد فلوسكم ، وبطلوا يتعبوا خلق الله ويدوخوهم ، أكيد الدنيا تبقى أحسن بكتير وأرخص ، والخير حيعم.
وأخيرا سلامي لسيادتكم، وآسف للإزعاج ، بس لو سمحت هاتوا لي حقي من اللي سارقين الكهربا وسارقين الضرايب .
إمضاء
ناجح البواب
أول دكة علي يمين العمارة جنب تلاجة الحاجة الساقعه
وعلى الله قصد السبيل
________________________________________