 خالتي وخالتك

 بقلم : ناصر أفندي فؤاد
تستوقفني كثيرا أحوالنا، ويستوقفني أكثر ناجح بواب عمارتنا في غدوي ورواحي .
ناجح: سعادة الباشا ، أنا إجازة عايز أسافر البلد ، عندي مصلحة.
العبد لله: طيب وليه متعملش مصلحتك من القاهرة ، احنا في العاصمة، يعني كل المصالح والبيانات في القاهرة .. ليه الشحططة.
ناجح: سيادتك لا مؤاخذة من غير علام فاهم غلط ، أيوه فعلا المصالح كلها هنا ، بس بيطلبوا مستندات بشرط ان يكون عليها ختم بلدنا ، إيه الفايدة يا باشا ، تقديم في القاهرة وطلبات من بلدنا كده ولا كده مسافر البلد ، يبقى أعمل كل حاجة في البلد وخلاص لا هي زيادة وجع قلب.
العبد لله: أمال فين مكاتب الخدمات الحكومية ، دول قطاع خاص وعندهم كل الصلاحيات ، وكمان رسوم تقديم الخدمات عندهم أرخص من التنقلات .
ناجح : يا باشا احنا عندنا فتحوا مكتبين في الشارع ، وجه المحافظ افتتحها ومعاه ناس من القيادات ، وعملوا لمساعد المحافظ شهادة ميلاد ، وبعد شهر رحت لقيتهم قلبوها تأجير سيارات ،
العبد لله : إنت عارف بتفكرني بإيه ، بتفكرني بمثل قديم معناه الكل أخد اللقطة الأولي زي كل حاجة في مصر وبعدين خالتي وخالتك واتفرقوا الخالات .
وعلي الله قصد السبيل ..
جواب
من محمد عبكريم لجرجس عبد النعيم من صدر أمي انت اخوي مَش ابن جدي وأبوي اخوي وليك حقوق طول عمرك راجل وذوق ا.
أكتب إليك بشوق وعلي راسي انت لفوق كيفك وكيف حماتك وأم مينا مَراتك متوحشلك حقيقي مانت أخويا وصديقي من يومنا واحنا حبايب واكتر من القرايب فاكر لما انضربنا لما ضاعت كتبنا سيبناه جنب طوبة وبالكورة رحنا لعبنا قفشنا خالك ملاك والعلقة كانت هلاك .
بيتكم منفد لبيتنا وغيطكم كان لزق بيتنا من صدر أمي انت اخوي مَش ابن جدي وأبوي عيدكم اكيد يبقي عيدي طول عمر ايدكم فأيدي نبني نعلي فبلدنا علشان يعيش ولادنا دايما في حب وسلام وأخيرا ومش آخر الكلام جايلك قريب ياسيدي .
إمضاء أخوك ابو ابنك هريدي ناصر أفندي فؤاد