 سخن وبارد

 بقلم / ناصر افندى فؤاد
الاصطلاحات والتشبيهات التي تستعمل حاليا من السواد الاعظم من المصرين الشباب والتي اجد صعوبة في تفهمها في بعض الاحيان مثل "فاكس" او "قلش" او او اندهش تماما حينما يستعملها ناجح البواب .
ناجح البواب : ياباشا البشر بيحلقوا للحكومة طحن ، خلاص مفيش انتماء .
العبدلله: وايه علاقة الحلاقة بالحكومة بالطحن ، شكلك بتتعاطي حاجة مخلياك ملخبط علي الاخر .
ناجح: ياباشا بتحلق يعني بتنفض يعني بتطنش او بتشتغلها وطحن يعني جامد او ملهوش حل .
العبدلله: الله الله يا عم ناجح او يا مان علي رأي الشباب اللي انت بتقلدهم ده ايه تعدد الثقافات والالسن ده ، دي حاجة محصلتش ، وبلاش ياباشا انت راجل مثقف وعارف انه من ٦٤ سنة وبالتحديد يوم ٣ اغسطس ١٩٥٢ صدر قرار بألغاء الالقاب يعني مفيش بيه ولا باشا ولا اي حاجة من دي ، المهم نرجع للناس اللي بتحلق للحكومة فهمني معاليك يا عم ناجح الحكاية بتمشي ازاي .
ناجح: عند سعادتك موضوع القمح بعض الشون واصحابها بيحلقوا للحكومة وبعض المفتشين بيحلقوا لاصحاب الشون وبعض الموظفين بيعرقوا من الاتنين واخيرا مجلس النواب اتدخل لما الريحة بقت للسقف وده الموضوع السخن الايام دي .
العبدلله: هو فيه سخن وبارد بلدنا ولازم تظبط الترموستات مش سخن وبارد ناجح: طيب ايه رأي سيادتكم علي مخالفات الردار ، اه دي من الحاجات البارده جدا ، الصيف دخل وكل طرق السواحل زحمة والناس بتمشي بسرعة علي طرق السفر والرادار بيصطاد اللي بيزود عن السرعة المقررة .
العبدلله: القانون والنظام مبيزعلش حد .
ناجح: ده لو القانون بيتطبق صح ، انما من كام يوم الرادار اصطاد جارتنا وهي لمحت الراجل اللي قاعد بالرادارمستخبي ورا كومة زلط علي الطريق وهي ماشيه بسرعة وقفت علي جنب وراحت له وادته خمسين جنيه وطبعا ولا بلغ عنها ووقف يتكلم معاها وساب الرادار والعربيات تعدي وسرعتها مخالفة بس هو مش فاضي كان بيحلق للحكومة.
العبد لله: ياساتر يارب هو فيه كده ، ده شئ بارد فعلا ناجح: وموضوع الدولار موضوع سخن علي الاخر ، سماسرة عملة بيسافروا الدول العربية ، يلفوا علي العمال والموظفين المصريين ياخدوا منهم العملة ويسلموها لاهلهم بالجنيه المصري في مصر والسعر ازيد من مصر بكتير جدا وكده بيحلقوا للحكومة ومفيش دخل من العملة الاجنبية يدخل البلد ، منه محاولة لتجويع الشعب زي ما سيادتك عارف ومنه كسب ملايين لانهم بيدوا العملة للمستوردين المصريين بره مصر من غير اي رقابة يعني برضه بيحلقوا للبنك المركزي .
العبدلله: ياعم ناجح انت النهارده شغال علي مصر عمال تدخلها في سخن وبارد وسخن وبارد ربنا يستر عليها من الالتهاب الرئوي .
وعلي الله قصد السبيل
كل شوارعك يا بلدي سكني وعنواني وان وسعت وان ضيقت تساع حلمي ماتنساني بحبك حتي لو تقسي علي وتشدي مانا انت وانت انا وفيك وطني وأماني وعجبي ناصر أفندي فؤاد