• الحلنجي ..!!

• بقلم / ناصر أفندى فؤاد
سافر ناجح إلي بلد أسيوي كبير بصحبة أحد الإخوة العرب وللتذكرة حتى ينجلي لكم السبب فناجح البواب وأهل بلدته كلهم يتحدثون أكثر من لغة نظرا لوجود أماكن سياحية تاريخية عندهم ونظرا لانحصار السياحة فقد آثر ناجح العمل كبواب بدلا من خاله الذي توفي منذ فترة ، المهم أن جارنا الذي يحمل إحدى جنسيات الدول العربية يستخدم ناجح كترجمان أو مترجم له ، ولمعرفة ناجح باللغة الإنجليزية تحدثا وقراءة فقد قرر جارنا أن يسافر ناجح معه إلى دولة أسيوية في رحلة عمل قصيرة فهو يضع ثقته في ناجح البواب وعند عودته كان لي هذا الحديث معه .
العبد لله: مساء الفل يا ناجح أخبارك إيه بقالك يومين نايم من بعد ما رجعت من سفريتك الأسيوية لعلك تكون بخير.
ناجح : الحمد لله بس يا باشا تغير الوقت والرحلة الطويلة بتخلي الواحد راسه تقيلة وعاملة زي الصندوق الكبير اللي فيه بلية صغيرة عمالة تخبط
العبد لله: تعبير جديد بس بليغ طمني الحمد لله اتوفقتم في رحلتكم وانبسطت هناك .
ناجح: الحمد لله التجارة مشيت تمام وزرنا مكاتب ومصانع والناس هناك آخر اهتمام بالعمل والبلد منظمة ونضيفة جدا والاتفاقات تمت كما ينبغي ، والحمد لله الترجمة كانت لحد هنا سهلة ، والاتفاقات كانت واضحة من غير أي نصب ولا شغل الجلا جلا .
العبد لله : شغل جلا جلا ازاي يا ناجح هو فيه عندهم شغل جلا جلا .
ناجح: يا باشا أول ما رجلنا نزلت المطار بعد ١٦ ساعة سفر وخرجنا من باب الخروج وجوه المطار ، لقينا ناس واقفة بيفط عليها اسم الفنادق ، طبعا أنا طلعت ورقة الفندق وقعدت أدور عليه لحد ما لقيت واحد نص نايم معاه يافطة فندقنا ، سألته يوصلنا عمل فيها عبيط ومبيعرفش انجليزي وقعد يرطن بلغتهم ، وبسرعة ظهر واحد عيل حلنجي وبيتكلم انجليزي وقال أنا أعرف أجيب لكم الليموزين بتاع اللوكندا بتاعتكم تعالوا معايا ، طبعا جارنا العزيز راح ماشي معاه ، وبما اني قديم في مسائل السياح وشغل الحنجل والمنجل وقفت جارنا وسألت بكام يا أخينا فسأل انتم الاتنين ، طبعا أنا عرفت علي طول إنه نصاب قلت له أيوه امال واحد حيركب ليموزين والتاني يجري جنبه ، عمل نفسه مش سامعني وقال انتم الاتنين ١١٠٠ ج ـ مصري تقريبا ، قلت له لا إحنا حناخد تاكسي بعداد من بره المطار بسرعة رد ده موقف التاكسي بعيد والدنيا بتمطر ، رديت وماله مفيش مشكلة رد بسرعة التاكسي عندنا ضيق ومش حياخد إلا نفر واحد ، رديت أنا وقلت ليه هو التاكسي عندكم موتوسيكل وماله نروح نجرب ، قال طيب ايه رأيكم انا استريحت لكن وحجيب واحد زميل لي حياخد منكم ٥٠٠ جم بس يالا بينا ، طبعا جارنا قال يا ناجح فرصة ، يالا ، بس أنا قلت لا إحنا حندفع ٢٠٠ جم بس مفيش غيرهم ، ومش عاجبك امشي وأنا بقول كده لمحت يافطة مكتوب عليها اتوبيس اللوكندات والفنادق سعر موحد ، رحت رايح عليها ، كان الحلنجي جاب واحد ماسك يافطة عليها اسم الفندق بتاعنا وقال أنا حاخد ٤٠٠جم أصل أتوبيس المطار حياخد ٤ ساعات علشان يوصلكم ، طبعا انا كنت وصلت لحد مكتب اتوبيس المطار وحجزت احنا الاتنين بحوالي ١٩٠ جم اتوبيس فاخر فيه كل حاجة حتي الانترنت ووصلنا لحد باب الفندق في ساعة واحدة بس .
العبد لله : يا ساتر هو فيه ناس كده ، دول يبوظوا السياحة في بلدهم.
ناجح : ايوه بس من غير زعل فيه أفظع من كده في مصر في مطار القاهرة .
وعلى الله قصد السبيل ..