 العمل .. ووقت الاجازات

 بقلم : ناصر افندى فؤاد

اسئلة ناجح لا تنتهي وما يدور في رأسه من اسئلة اكثر بكثير مما يسأله وكثيرا ما يكرر نفس السؤال ولذلك احيانا يحتاج السائل الي قصة او حكاية لتقريب المعني .
ناجح : مساء الفل ياباشا رمضان كريم
العبدلله : الله اكرم مساء الخير اخبار الصيام ايه يا ناجح
ناجح : الحمدلله ياباشا بس الشوارع فاضية وسيادتك شايف الساعة ٥ وحضرتك وصلت مع ان ميعاد سيادتكم في الايام العادية ٧م .
العبدلله : اولا مواعيد رمضان بنخلص شغل بدري ثانيا معظم الناس واخدة اجازات .
ناجح : الناس واخدة اجازات علي طول مع ان رمضان شهر عمل والبلد محتاجة شغل من نار مش اجازات علي طول او حتي ناس مش بتنتج في بلد محتاجة كل واحد حتي العيال تشتغل .
العبد لله : انت عارف احنا عاملين زي ايه يا ناجح زي الحكاية القديمة بتاعت ال ٣ اللي كان عندهم مصنع ورثوه عن ابوهم وكان شغال كويس جدا ومش اعظم مصنع بس مكفي نفسه وبيكسب مكسب يمشي بيه التطوير ويوفر بسيط ، مشكلة المصنع ان عماله كانو اكتر من اللازم ومن احتياجه ، بس ابوهم كان شايف ان ده فيه خير علشان يقلل البطالة ، لما جم يقسموا المصنع اتفقوا ان الكل يشغل المصنع وانهم يروحوا كل يوم ، وفضلوا كام شهر في الاول شاغلين بهمه والايراد زاد ، وفي يوم فكر واحد فيهم ان يريح اسبوع ومفيش مشكلة المصنع حيشتغل .
وفي اخر الاسبوع لقي ان الايراد زي مهوه فقال مش فارقة اروح ولا لأ، الاتنين التانين قالوا زي ما اخونا اخد اجازة واحنا شيلنا شغله ناخد احنا اجازة ، طبعا اول اسبوع التلاتة اخدوا اجازة الشغل مشي كويس والايراد زي ما هو ، كل واحد قال اكمل اجازة ماهو الشغل ما شي كويس ، اسبوع جر اسبوع والعمال بيقوا يخبطوا فبعض والمصنع فلس في لحظة عين والعمال عايزين فلوسهم واضطروا يستلفوا علشان يقوموا المصنع ولحد ما يقوم استلفوا علشان يسددوا الفوائد، ووقعوا في الدوامة وبقي المصنع من جيبهم لمعدتهم وبس ومفيش تطوير والديون بتزيد .
ناجح : بس ياباشا ان قربت اعيط اللهم اني صايم .
وعلي الله قصد السبيل