فرديتين وبس ..في بعض الأحيان

بقلم : ناصر أفندى فؤاد
مصطلح جديد سمعته أول مرة من سائق تاكسي "غلط الصح"، من وجهة نظره أنه لا توجد مشكلة في أخذ الحقوق بطريقة خاطئة وضرب مثلا لرئيس احد الأندية الرياضية الاجتماعية الكبرى أنه يفعل كل شئ خطأ للوصول للوضع الصح ، لست معه فيما يقول ولكنها وجهة نظر بدأت تنتشر بصورة كبيرة جدا وغير مبررة ، وأخشى ما اخشاه أن نتحول إلي شريعة الغاب ، تذكرت "غلط الصح" وأنا استمع إلى ما قاله ناجح.
ناجح : إيه رأيك يا باشا عندي مشروع ما حصلش يا باشا مشروع زي ما بيقولوا لوز اللوز ، وينفع ناس كتيرة في مصر ، وما يضرش ولا يعورش اللي يستعمل معاهم.
العبد لله : جديدة حكاية مشروعك الغامض ، لو تحب تقوله لي ولا خايف حد يخطفه منك.
ناجح : المشروع ده من واقع حياتنا وعلشان كده نجاحه اكيد.
العبد لله: طيب ابدأ احكي علشان المحكمة تتنور.
ناجح : سيادتك بتابع اللي بيحصل وكل شويه واحد يُقلع جزمة ويضرب حد بيها ، وفي النهاية يقعد يدور علي جزمته او يروح حافي ، انا طبعا قلت بما ان الضرب بالجزم كتر يبقى لازم اشوف له حل ينفع يبقي شعبي وينفع يبقي أرستقراطي كمان ، المهم يا باشا حضرتك تقدر تقول لي الجزمة كام فردة.
العبد لله : فرديتين وبس ايه السؤال الساذج ده.
ناجح : هو ده أساس المشروع .
العبد لله: يا ناجح كويس الفردة دي خش في الرباط اقصد خش في المشروع.
ناجح: اتريق يا باشا المشروع ده حيطرح في البورصة، مَش حاخد من وقت سيادتكم كتير ، انا اخترعت فردة تالته تركب في الناحية البرانية من فردة الجزمة بتاعتك يمين او شمال لو كنت أشول ، الفردة اللي يتركب وزنها اقل من الفردة العادية وبيركب تقل بنفس وزنها في الرجل التانية علشان المشي وتوازن الجسم .
العبد لله: الله يا عبقرينو ايه بقه مواصفات الفردة القتالية الطائرة او الضاربة.
ناجح : اولا هي وزنها مناسب انها تطير وتضرب ومن غير ما تعور وبعدين جواها كيس بيتملي تراب علشان تبقي زي اللي ملبوسة تماما وكمان تقلها مناسب لا هي رظيه ولا هي ريشة، ولو ضاعت مَش مهم انت معاك فردتينك ما فيهمش مشكلة .
العبد لله: ايه يا عّم انت العك ده الضرب بالحذاء غير قانوني ، ويدخل اللي بيضرب السجن ودي مشكلة توقف بيع منتجك ده.
ناجح : واضح ان سيادتك مَش بتقرأ الجرايد الـ ١٩ اللي بيجوا كل يوم لك ، مَش دي المشكلة بالمرة.
العبد لله: انت بتعد الجرايد علي ، علي العموم ده مَش موضوعنا، ايه المشكلة.
ناجح : المشكلة مَش في عقاب اللي بيضرب لان اللي اتضرب اترفد واللي ضرب بقي بطل والعقاب بتاعه بسيط ، انا مشكلتي اكبر اعمل الفردة الجديدة يمين ولا شمال.
وعلي الله قصد السبيل...
البح الدح الصح
ولا كل حاجة نعملها بتبقي صح
الدنيا فيها الكخ و فيها الدح
وانت اكيد واحد وزي الناس
ساعة تلاقيها جيالك وساعة بح.
وعجبي ...