ميوشلان والبتنجان

بقلم : ناصر أفندى فؤاد
تصادفنا في الحياة كثيرا من النماذج رغم وصولها إلي مناصب رفيعة ما زال يؤمن بأن ما أصدره نوبار باشا من مراسم هي النافذة حتى الآن وهي الأمان والضمان ، لا يصل تفكيره مطلقا إلي أن الهدف من عمله هو خدمة الناس وإعلاء قيمة ما قامت عليه مؤسسته ولكن يقتصر ما يفعله على حماية وعصمة شخصه من الذلل أو الخطأ ، هذا النوع من البشر يتميز بنرجسية لا حد لها ، لا يتقبل آراء الاخرين قابلتهم في حياتي كثيرا وتذكرتهم بعد حديثي مع ناجح بواب عماراتنا الذي أضحي من أشهر البوابين.
العبد لله: البقاء لله وحده سمعت أنك كنت في جنازة لقريب لك ، ربنا يجعلها آخر الأحزان.
ناجح : ما فيش تعازي لحد ما ناخد بتاره ونبرد نارنا ، وصعب أنها تكون آخر الأحزان طول ما فيه عقول عفشه موجودة .
العبد لله : تار إيه إنت جرى لمخك حاجة ولا إيه ؟ ده توفي في بيته مريض ، حسب ما سمعنا ، ولا إنت بتتكلم علي حد تاني ، وبعدين مين اللي يضحي بحياته منكم ويبدأ سلسال دم.
ناجح : لا يا باشا هو فعلا مات في بيته ، لكن التار له حكاية ، بقي يا باشا قريبي فجأة جاله مرض وحش بعيد عنك ، الدكاترة قالوا إنه محتاج عملية تتكلف ٢٤٨٥٠ جم بالتحديد ، معاليك عارف أننا عندنا رابطة بتاعتنا ، وعلشان تبقى الرابطة لها قيمة ، جبنا الأستاذ "عظيم فرحان" وعملناه رئيس الرابطة وهو عمل اللوايح وبما إنه كان مسئول كبير ، ما حدش دور وراه ، المهم قدمنا طلب للرابطة معاه مطالبة ، الراجل ما كدبش خبر رد علينا بسرعة ، هو بأمانة في رفض الطلبات فريرة ، قال الحد الأقصى للصرف ٢٤٠٠٠ بس ومش ممكن يعمل استثناء ، رحنا قلنا ندفع إحنا الـ ٨٥٠ جم ، قال ما ينفعش هاتوا مطالبة جديدة، فعلا جبنا المطالبة بـ ٢٤٠٠٠ جم بس ودفعنا الباقي للمستشفي حجز ، أخد الطلب وقال إن أقصي حد له كرئيس رابطة للصرف في اللايحة ٢٠٠٠٠ جم ولازم يدعو مجلس الرابطة علشان يقدر يطّلع الفلوس .، طبعا قريبنا كان روحه طلعت قبلها
العبد لله: يعني حيفيدكم إيه تقتلوا الأستاذ "عظيم" وتدخلوا السجن
ناجح : يا باشا إحنا بنفكر بره الصندوق ما فيش عزاء إلا بعد ما نشيل الأستاذ "عظيم" من الرياسة ومن الرابطة ونغير اللوايح ونجيب حد فاهم ، كده يبقي أخدنا بتارنا .
العبد لله : انت عارف أنكم بتفكروني بالأخين ميوشلان.
ناجح : بتوع الكاوتش.
العبد لله: أيوه لما ركدت تجارة الكاوتش بتاعهم ما رموش مسامير في الشوارع ، شافوا اهتمام الناس إيه ، وعملوا خرايط مطوية تقدر تشيلها في العربية ، عليها البلاد المشهورة والمطاعم اللي بتعجب الناس جدا ، وكلمتين عن البلد وعن المطعم ، الناس بقت تسافر وتشوف والكاوتش يتاكل ، وهم يبيعوا.
ناجح: عارف الأستاذ "عظيم فرحان" كان عامل إيه بالخريطة دي لو لقاها.
العبد لله: عمل إيه يا عبقري؟
ناجح : لف فيها سندوتشات البتنجان يا باشا.
وعلي الله قصد السبيل