اوبر وكريم والابيض اللئيم

بقلم ؛ ناصر فؤاد
اشياء ومشاريع كثيرة تحدث في مصر تبدأ صغيرة وبسيطة امام اعيننا وبمعرفتنا سواء مواطنين او حكومة وحينما تكبر وتخلق المشاكل نحاول ان نحلها بعد فوات الاوان
هب ناجح واقفا امامي وصاح في من كان يجلس معه ليقترب مني
ناجح: قرب احكي مشكلتك للبيه واكيد وبأذن الله يقدر يحلها
العبد لله : استر يارب انا حاسس انك بدبسني يا ناجح
ناجح : احكي يا ابيض للباشا
الابيض : بقي ياباشمهندس انا اسطي سواق بريمو باخد مصر كلها في التاكسي بتاعي ديريك يعني مباشر لامؤاخذه ومخلي التاكسي فله مزوقه من بره ومن جوه ، اشي عرايس اشي كلاب بتهز راسها اشي فواحه كل حاجة تخلي العربية عروسة انوار تلعلط من قدام ومن ورا
العبد لله: حاجة جميلة فين المشكلة
الابيض : ياباشمهندس الموضوع طويل ولازم اقول لسيادتكم بالتحابيش اللي حواليه
العبدلله : اللهم طولك ياروح
الابيض: احنا طايفة التاكسي جالنا كتير من المصايب والمحن وعدت علينا ياما حاجات، انما اخر صيحة كريم
العبدلله : ده وزير جديد ولا رئيس المرور ولا الضرايب ولا نقابة السواقين
الابيض: كريم ده تاكسي زي اوبر يا باشمهندس
العبدلله : طيب ايه مشكلة اوبر معاك دي شركة محترمة ومش بتاخد من حصتك حاجة ، الاغلب اللي بيتعاملوا معاهم ستات ورجالة مبيستعملوش التاكسي الابيض او الاسود
الابيض: المشكلة اننا بندفع علشان نجيب النمرة البرتقاني ٤٠ الف جتيه وبنعمل تحاليل مخدرات وكل مرة يقولوا اصل التحليل باظ ونعمل تحليل جديد وندفع ١٦٠ جم تانية وبندفع ضرايب وبندفع رخصة ولازم يكون فيه سواق عضو نقابة وناس ترخم عليك واللي يستنطع ويركب ببلاش
العبدلله : بس اوبر وكريم ارخص منكم ومبيلعبوش في العداد ويشغلوه سياحي ومتركبش عربيتهم تنزل مبقع ومزيت ومترب ، وبيشغلوش اغاني بصوت عالي ، وبيعملوا الناس كويس ، وممكن تعرف اسم وشكل السواق قبل ماتركب واذا ركبت بنتك ممكن من الانترنت تعرف مكانها كل لحظة
الابيض : بس مبيدفعوش ضرايب وممكن يطلع فيهم واحد معهوش رخصة وهم مش مرخص لهم يشتغلوا في نقل الركاب ، وبعدين يا باشمهندس هو احنا حد طلب منا نعمل زيهم ومعملناش واحنا معندناش مانع يقلبوا تاكسي بجد واحنا نقبلهم ، انما يشتغلوا شمال وياخدوا التسعيره اللي علي مزاجهم
العبدلله:لو ظبطوا نفسهم يبقي تمام والناس ساعاتها مش حتركب معاكم وتقعدوا تنشوا
الابيض: انا مش عارف حضرتك مضايق منا ليه انا جاي علشان تحل المشكلة تقوم تاخد صف الغلطان
العبد لله : اولا انا مش في صف حد ثانيا ايوه ان متغاظ منكم جدا
الابيض : ليه بقي عملنا لسيادتك ايه
العبدلله: معملتوش لي حاجة بس انتم اعجب سواقين تاكسي في العالم انت السواق الوحيد اللي بيختار الراكب وبيسأل الراكب رايح فين قبل ما يركبه
وعلي الله قصد السبيل