ناجح البواب دبلوم تجارة

بقلم ناصر افندي فؤاد
فوجئت بالاسطي سعيد الحلاق واقف مع ناجح البواب ومعه حقيبته التي يضع بها ماكينة الحلاقة وباقي عدته
الاسطي سعيد : يا صباح الجمال يا معالي الوزير اخبار معاليك ايه
ناجح : يا راجل يا ملزق بلاش تتحنجل وبطل كلامك اللي ابرد من موسك التلم ادخل في الموضوع علي طول
الاسطي سعيد : ياباشا سيادتك بقالك مدة مبتحلقش معانا ، هو حلاقتنا مش الافرانكا
ناجح : ياتلم هو الباشا عمره حلق عندك الباشا عنده عدته وبيحلق لنفسه
العبدلله: هو انتم بتغنوا علي بعض قدامي ، انا مش فاضي للكلام ده
ناجح : صح ياباشا بس الاسطي حلاق عنده محل تمليك مأجره لمزين وبرضه معاه الشنطة وبيلف يحلق لزباينه ، مل ده علشان يهرب من الضرايب ويحافظ علي بطاقة التموين ومعاش السادات
الاسطي سعيد : خمسة وخميسة في عين كل من سمعك ومصلاش علي النبي ، انا ياباشا جي اخد رأي سيادتك في ابني الوحيد مسألة حياة او موت
العبدلله : خير اللهم اجعله خير
الاسطي سعيد : الواد الحيلة ابني ، ولد علي ٥ بنات وكله والحمدللهاتعلموا تعليم عالي اكسترا وفيه منهم اتنين عملوا ماجستير ، انما الواد خايب ودخلناه صنايع بالواسطة ، اهو يبقي معاهدبلون ويمكن تضرب معاه ويخش هندسة
ناجح : يا طول بالك ياباشا ده حلاق شغلته اللت والعجن
الاسطيً سعيد: ياباشا المدرسة كلها عيال مستبيعه ومطاوي ، والواد انا خايف عليه ، سألت وعرفت ان المدرسين سلكاويه كلهم ، اتفقت مع مدرس منهم انه ياخد ٣٠٠ جم في الشهر
العبد لله: هو فيه دروس خصوصية في التعليم الثانوي
ناجح : لا يا باشا الفلوس لعدم التعرض مش لدرس خصوصي
الاسطي سعيد: لا يا فالح لا تعرض ولا تحرش ، لا مؤاخذه ياباشا ، المدرس بياخد ١٥٠ جم اول الشهر والباقي بياخده بعد ظهور نتيجة اعمال السنة وامتحان نص السنة او اخر السنة ولو الواد جاب اكتر من ٨٠٪ اخر السنة ياخد باكو باستكه
العبدلله : لا بقي فهمني ليه
الاسطي سعيد ؛ ياباشا هو انت مش من البلد دي ، الواد قاعد في البيت جنب امه او مع اصحابه والمدرس بينجحه في كل المواد هو وزمايلهبيملوا العيال ويرسموا علي السبورة والعيال تنقش، الفرق في الدرجات بين العيال ان في منهم بيعرف يقرا ويكتب وفي مبيعرقش ، بس اخر مادة في امتحان نص السنة المدرسة جالها كبسة من الوزارة فالواد ساب الورقة فاضية .
العبدلله: وطبعا سقط في المادة دي.
الاسطي سعيد : فال الله ولا فالك لا ياباشا الواد نجح وجاب ٧٥٪
العبدلله: مش فاهم انت عايزني في ايه
الاسطي سعيد: تكتب لي تظلم يراجعوا ورقه ويعيدوا تصحيحه علشان هو يستاهل من ٨٠٪ ل ٨٥%
وعلي الله قصد السبيل