 رؤية  ناجح البواب ..النص التحتاني

 بقلم :د/ ناصر فؤاد
للمرة العاشرة خلال وقت قصير يطالبني ناجح البواب بثمن تغيير صنبور المياه الموجود بمنور العمارة والذي يستخدمه اثناء تنظيف العمارة.
ناجح : ياباشا عايزين نغير الحنفية اللي في المنور لأ نها سابت وباظت
العبد لله : غريبة جدا ، هو انت بتستخدمها كام مرة في الشهر ، انت يدوب بتنضف العمارة مرة في الأسبوع ، ولسه مغيرينها الشهر اللي فات، هو أنت عندك قوة خارقة بتكسرهم ولا أيه
ناجح : الله أكبر خمسة وخميسة ، انا ولا بتعافي ولا بستعفي ، الصناعة بقت تعبانة ، ضغت الميه في المنور أقوي بكتير لأن دي الماسورة اللي جايه من الرئيسية مباشر، الصناعة المصري مبتستحملش.
العبد لله : اشتري حنفية ألماني وخلصنا ، العمارة اللي جنبنا عملوا كده من فترة طويلة وشغالة زي الحلاوة.
ناجح : عجبت لك ياشعب ، صدرت الصناعات كلها للعالم ومش عارف تعمل حنفية عدلة، بس أزاي مش قادر أفهم ، هم دماغهم أحسن ولا أحنا دماغنا فيها حاجة.
العبد لله : الفرق مش في الدماغ ، الفرق في طريقة التفكير.
ناجح : ليه أحنا بنفكر شمال
العبد لله : لأ أحنا مشغولين بحاجات تانيه ، بعيده عن الهدف
ناجح : نورني ياباشا ، وضح ، اشرح ، الهي يسترك.
العبد لله : جحا كان ماشي طول النهار والليل في البلد اللي هو فيها عمال يفتي ، عامل نفسه أبو العريف ، الخليفة زهق من كتر التدخل والفتاوي ، بعلم ومن غير علم ، قرر يجيب واحد عالم علشان يسكت جحا للأبد ويعرفه حجمه الحقيقي ، يوم المناظرة ، الراجل العالم الأجنبي رسم دايرة علي الأرض ، جحا قسمها بخط طويل من النص، راح مشاور ب3 صوابع لجحا جحا شاور للراجل الأجنبي العالم بصباع واحد وبطريقة التهديد ، العالم الأجنبي راح مدور ووطي علي الخليفة وقال " جحا دماغه جباره مش حقدر عليه " الخليفة سأله ليه رد العالم الأجنبي وقال رسمت له الكرة الأرضية رسملي خط الأستواء قاسم الكرة الأرضية ، شاورت له ان المياه تقريبا تلات أرباع الارض ، رد وقال الربع تقريبا يابس ، الخليفة أدي جايزه لجحا وسأله بس أنت يا جحا أزاي من غير ولا كلمه قدرت تكبس ، رد جحا وقال "أنا بعرف أتعامل مع الأشكال دي كويس ، راجل طفس وعينه زايغه ، عينه علي صنينة البقلاوة اللي قدامك يامولانا عايز يلهفه لوحده ، رسمها لي علي الأرض ، قسمتها نصين كأني قلت له كفاية عليك نصها ، عينه زاغت علي الجواري الحريم بتوعك عايز ياخد التلاته اللي واقفين زي القمر ، شاورت له انه ياخد واحده بس "
وعلي الله قصد السبيل