ناجح البواب .. "حبسة مَيّه"

بقلم د. ناصر فؤاد

أذهلني ناجح ـ بواب عمارتنا ـ عندما سمعت منه هذه القصة..
ناجح : يا باشا احنا بنعيش في زمن العجايب، حتى المتعلمين واللي معاهم أعلى الشهادات ، بقى نظامهم مش ولا بد ، كلامهم زي ما بيقولوا بقى سوقي مع الرايجه .. لا مؤاخذة ، يعني سعادتك والله العظيم لو سمعت حكاية الواد عمار المنادي .. مش ممكن تصدق انها حصلت .
العبد لله : خير يا عم ، احكي وخُش في الموضوع، من غير تطويل ولا لف ولا دوران ، ولو عايز سلفة ولا منحه، دوّر علي حد تاني، الناس كلها قربت تبيع الحديدة .
ناجح : يا باشا دي حكاية لها علاقة بالطب والدكاترة ، ومش ممكن سعادتك أو أصحابك تشوفوها ، لأنكم بتروحوا لدكاترة أساتذه كبار ، بياخدوا الشئ الفلاني.
العبد لله : بدأنا في اللخبطة في الكلام ، انت حتنق حتى في المرض، قل أعوذ برب الفلق، النهار ده الخميس 25 يعني 5 في 5 .
ناجح : لا والله بس ده لزوم الحكاية يا باشا ، الواد عمار جاله زنقة في الميه.
العبد لله: زنقة في الميّه!
ناجح : احتباس في البول بسيط يعني يا باشا ، راح لدكتور جنب بيته في إمبابة، حته اسمها جامع فلفل ، دكتور مشهور هناك وله صيته، مراته هي اللي قالت له عليه ، أصله عالجها لما كانت مكبوسة.
العبد لله : اتحفنا بالمصطلحات العظيمة بتاعتك.
ناجح وقد بدا عليه الضيق من غبائي وعدم معرفتي بالمسلمات: مكبوسة يعني "مشوهره" ست بترضّع أو لسه والده جديد .. واحدة دخلت عليها بلحمة نية أو وهي لاموأخذة يعني ، فاللبن بيقطع ، المهم يا باشا عمار راح للدكتور وحكى له انه عنده حبسة بول ، الدكتور خلاه يشرب عصير قصب بعد ما عرف انه أخد دوا لوجع الجسم هو اللي عمل له الحبسة دي ، بس الدكتور طلب منه عينة أحسن يكون الدوا أثر علي الخلفه عنده ، راح عمار جاب العينة للدكتور وتاني يوم فات عليه ، الدكتور قال لعمار "انت صعب جدا تخلف ولازم تاخد علاج" عمار لطم " .. يا ساتر يا دكتور ده أنا عندي عيّل وسعادتك عالجت مراتي لما كانت مكبوسة" رد الدكتور "أيوه افتكرت انت حتى عليكم 2 جنيه ادفعهم وانت خارج ، يا عمار العينة اللي جبتها دي عملتها عندنا ولا في بيتكم" رد عمار " لا مؤاخذة في البيت" الدكتور قاله التحليل ده ما ينفعش معاه العينة المنزلية ، احتياطي حنعمل عينة جديدة بتحليل جديد و7 جلسات تدليك وانت حتبقى "زي الفل"
العبد لله : وحصل إيه بعد كده.
ناجح : عمار عمل التحليل قبل وبعد الجلسات وبقى عنده عربيتين ميكروباص شغالين على خط امبابة.
العبد لله : معقول الواد عمار عنده عربيتين.
ناجح : لا يا باشا الدكتور اللي عنده عربيتين.
وعلي الله قصد السبيل