ناجح البواب .. شد السنجة

بقلم : د. ناصر فؤاد

يضطر العديد من الناس حينما يسألهم البعض أسئلة ، الاستعانة بأمثلة تمس حياتهم لتبسيطها وحتى ترسخ إجابتهم في عقول السائلين ، وحتى لا يتهموا بأنهم من كوكب آخر ، من هذا النوع من الأسئلة سألني ناجح بواب عمارتنا الهمام ، وهو يأخذ مني مبلغا كبيرا من المال ، فقد قرر السكان تركيب "انتركوم" بالمبنى ، مع إمكانية فتح باب العمارة الخارجي من الشقق بواسطة الضغط على مفتاح بجهاز الـ "انتركوم".
ناجح : يعني إيه الفرق بين حكم بالدستور والقانون ، وحكم بالدستور وروح القانون ، وحضرتك سيد العارفين أن القوانين محطوطة علشان تظبط الدنيا ، إيه بقى روح القانون ، أنا خايف تبقى روح يا قانون وانت طالق ، ولا يبقي فيه تطبيق للقانون إلا بطلوع الروح.
العبد لله : أنت حتتفلسف بعد ما لهفت الفلوس ولا إيه، وبعدين لا يصح انك تتريق على أحكام القانون.
ناجح : أنا ما بقصدش أحكام القانون والقضا ، أنا بقصد الحاكم يحكم بالدستور والقانون ، عصر الحاكم اللي
حا يحكم على هواه من غير رضا الشعب انتهي ،علشان كده سؤالي يعني إيه يحكم بالقانون أو يحكم بروح القانون.
العبدلله : كده فهمنا ، والله براوه عليك يا ناجح ، بس المفترض أن الدستور والقانون يخلّي الحاكم يحكم بإرادة الشعب ، وما يقدرش يحكم على كيفه ، الدستور بيضع للحاكم أسس الحكم ، ويحمي ويصون حريات الأفراد وحقوقهم ، ويمنع التعدي عليها من قبل الحكومة أو المواطنين ، والقوانين بتيجي تنظم كل ده ، لأن الدستور للأسس العريضة مش للتفاصيل الدقيقة.
ناجح : تمام يا باشا بس فين إجابة سؤالي ، هو عويص قوي كده ولا إيه ، أسالتي واعره يا دكتور خلي بالك.
العبد لله : ولما انت واعر كده عجل ولاد جيرانّا اتسرق ازاي من حوش العمارة ، ما هو أنت السبب في الحديد اللي اتحط على الباب والانتركوم والقفل الكهربا كمان ، واحنا اللي بنكع فلوس، نهايته أنا حبسط لك السؤال الواعر بتاعك ، عارف زمان كان عندنا وسيلة مواصلات اسمها التروللي مش عارف إذا كنت سمعت عنه ولا لأ"
ناجح معترضا : تكنش سيادتك فاكرني مش مثقف ، أنا طبعا عارف التروللي كان بيروح من العباسية لحد الجيزة وامبابة والكيت كات ، ياما ركبته مع خالي الله يرحمه ، وكان فيه كمان المترو بتاع مصر الجديدة والتروماي بتاع شبرا .
العبد لله : الله يفتح عليك ، هو ده بالظبط ، الفرق بين تطبيق القانون زي ما هو وتطبيق القانون بروح القانون مش بنصوص جامدة ، هو الفرق بين التروماي والتروللي ، التروماي أو الترام بيمشي على قضبان ما يقدرش يروح يمين أو شمال بمزاج السواق ما يقدرش يعدي تروماي تاني أبدا لازم يفضل طول عمره وراه ، السواق أو الحاكم بيتحكم في السرعة فقط إنما التوجيه لأ .. لأنه مسبق ومعروف ، لكن التروللي فيه سرعة ويقدر يحوّد مسافة صغيرة يمين أو شمال ويقدر ينزل السنجة ويعدي التروللي اللي قدامه ، عنده براح يتحرك فيه، لكن ما يقدرش يخرج عن المسار وما يقدرش يغير وجهته ، وعلشان تركز وتدخل في دماغ سيادتك ، مثلا لو واحد سرق عيش حاف علشان ولاده حتموت من الجوع ، تطبيق القانون بنصوص جامدة القانون بيعتبرها سرقة وياخد فيها اللي سرق حكم حبس ، لكن القاضي اللي بيحكم بروح القانون ممكن يديله حكم مع إيقاف التنفيذ ويطلب من الحكومة توفير عمل أو معونة له ، الحاكم اللي بيحكم بلد لازم يبقي عنده مرونة وفهم .
ناجح : جميل جدا التروللي طبعا أحسن فيه مرونة بس الخوف للسواق ينزل السنجة ويركن وكل اللي جاي وراه يسبقه ، هي دي المصيبة بتاعة التروللي .
العبد لله : والله أنا اللي خايف منه الركاب مش السواق أصلهم ممكن كل ما واحد يحب ينزل أو يركب حد بعيد عن المحطة يقوم يشد السنجة .
وعلى الله قصد السبيل