تكنولوجيا خراب العقول

كتبت رغدة محمد

الأم :حمادة انت فين يا بني؟
الابن :نعم يا ماما.
الأم :كده أبعت لك رسالة ع الواتس وأقولك فينك ما تردش .. كده تخليني أقعد أنده لك وتتعبني.
الابن :معلهش يا ماما كنت بنده على دينا من الأوضة اللي جنبي ع الواتس
الأم :إيه ده استنا .. أختك بتتصل بي ع الفايبر.
الأم :آلو إيه يا دينا.
الابنة :ماما ممكن تجيبيلي البلوزة الزرقة بتاعتي .. ممكن تلاقيها في الأوضة اللي جنب المطبخ.
الأم :يا لهوي يا دينا .. يا لهوي. كده تتعبيني وتخليني أخرج من المطبخ للأوضة .. إيه التعب ده.
الابنة : معلهش يا ماما انت ممكن تركبي السجادة الطايره وتجيلي يا ماما.
الأم : طيب يا ستي استني لما أشغل الباحث الآلي عشان يشوف البلوزة دي.
الأم :أف واهو الباحث الآلي.
الباحث الآلي :سيدتي مرحبا بك في برنامج الباحث الآلي.
للبحث عن الملابس اضغط 1.
الآم :أهو1.
الباحث الآلي :لتحديد نوع الملبس المفقود اضغط 2
الأم :أهو 2
الباحث الآلي :سيدتي ما هو الشيء المفقود أولا بلوزة. ثانيا سروال. ثالثا جيبة. رابعا أشياء أخرى.
الأم :بلوزة يا عم.
الباحث الآلي :سيدتي ما هو لون البلوزة المفقودة أزرق أم أصفر أم أحمر أم لون آخر.
الأم :أزرق .. أزرق.
الباحث الآلي :سيدتي ما هو المكان الذي تشكين أنه توجد به هذه البلوزة المفقودة
هل هو المطبخ، هل هو الغرفة التي توجد بجوار المطبخ أم أي مكان آخر داخل الشقة.
الأم :في الأوضة اللي جنب المطبخ.
الباحث الآلي :انتظار انتظار جاري البحث .. جاري البحث.
الباحث الآلي :سيدتي لم نتمكن من العثور علي شيء برجاء إعادة المحاولة والضغط علي صفر.
الأم :حرام عليك .. حرام أنا تعبت هو ليه لازم أقعد أدوس ع الزراير يعني ما تشتغل يا خويا بنفسك إيه التعب ده.. إيه التعب ده.
الابن :ماما ماما.
الأم :إيه يا حمادة.
الابن :البلوزة أهي كانت واقعة جنب رجلك.
الأم :يا رب عالتعب وأنا لسه هوطي وأجيب البلوزة أف عالتعب.
مجرد سؤال:
هل أصبحت التكنولوجيا وسيلة لتسهيل الحياة ورفاهية الإنسان أم أنها باتت وسيلة من وسائل رتابة الحياة وإصابة الناس بالكسل والملل والشعور بالفراغ في أحيان كثيرة ؟ أم أنه هو الاستخدام الخاطئ للتكنولوجيا الذي بدلا من أن يجعل الإنسان هو مالك التكنولوجيا والمتحكم بها أصبح مجرد تابع وأسير أعمي لهذه التكنولوجيا الحديثة؟