وزارة الاتصالات تبدأ تنفيذ مشروع طابعات ثلاثية الأبعاد لكل منزل مصري

أحمد: يااااااااااااااه أخيرا هيبقى عندي طابعة ثلاثية الأبعاد.
مجدي: ومالك فرحان أوووووي كده هو انت عارف هي بتستخدم في إيه.
أحمد: يا عم مش مشكلة مادامت ببلاش يبقى زي الفل.
مجدي: طيب ما تحاول تشوف ممكن تستخدمها في إيه علشان لما تيجي تعرف تخلص بيها كل اللي انت محتاجه منها.
أحمد: هو أنا لسه هشوف .. لما تيجي يحلها الحلال ولو عرفت هعمل إيه ما أنا كده كده هشوف لها سكة وأديها لأي حد يشتريها واستفاد بفلوسها ـ تكنولوجيا إيه يا سيدي .. إحنا عايزين ناكل ونشرب مش الأحسن والنبي يدونا بدالها زيت وسكر .
مجدي: طيب بقولك إيه أول لما تجيلك وتفكر تبيعها تعال وأنا هاشتريها منك، وأنا عارف الظروف وها خدها بسعرها ما تقلقش انت حبيبي.
أحمد: يعني هتديني كام ؟
مجدي: بص هي عامله 400 جنيه أول عن آخر أنا هاخدها منك بـ 400 يا عم والله علشان انت حبيبي بس.
أحمد: خلاص والله أول لما تيجي هدّيها لك سلام يا صديقي.
أحمد: آلوووووووو .. .. اذيّك يا محمود صحيتك من النوم ولا إيه.
محمود: لا أنا كنت صاحي بس التليفون ما كنش جنبي.
أحمد: بقولك إيه كنت عايز أكلمك في موضوع كده بخصوص الطابعة اللي هتوزعها وزارة الاتصالات كنت عايز أبيعها لما تيجي بس مجدي قال لي ها ياخدها مني بـ 400 وحاسس إنه بيضحك عليه.
محمود : لا سيبك منه أنا هاخدها منك 550 جنيه وما لكش دعوة بمجدي علشان هو كده بينصب عليك. ماشي سلام دلوقتي وهرجع أكلمك تاني.

ممكن سؤال؟
هل المصريون ليس لديهم متسع من الوقت للتعرف علي كل ما هو جديد في عالم التكنولوجيا..أم هل يستبيح المواطن حصوله علي منحة حكومية لا يعلم عنها شيئا .. أم أصبح الذكاء كيف نخدع بعضنا البعض؟